काठमाडौं । नेपाल प्रहरीले अबदेखि महिनामा दुई पटक तलब पाउने भएका छन्। प्रहरी प्रधान कार्यालयले मातहतका सबै कार्यालयलाई परिपत्र गर्दै आगामी आर्थिक वर्ष २०८३/८४ देखि अर्धमासिक (१५–१५ दिनको अन्तरालमा) तलब–भत्ता वितरण व्यवस्था लागू गर्न निर्देशन दिएको हो।
प्रहरी प्रधान कार्यालयका अनुसार अर्थ मन्त्रालयको निर्णय तथा महालेखा नियन्त्रक कार्यालयको पत्राचारका आधारमा राष्ट्रसेवक कर्मचारीलाई अर्धमासिक रूपमा तलब–भत्ता भुक्तानी गर्ने व्यवस्था कार्यान्वयनमा ल्याउन लागिएको हो।
नयाँ व्यवस्थाअनुसार प्रहरी कर्मचारीले पहिलेजस्तै महिनाको अन्त्यमा एकमुष्ट तलब पाउने प्रणालीको सट्टा प्रत्येक १५ दिनमा तलब प्राप्त गर्नेछन्।
प्रधान कार्यालयले सम्बन्धित निकायलाई आवश्यक आर्थिक तथा प्रशासनिक तयारी पूरा गरी नयाँ प्रणाली कार्यान्वयन गर्न निर्देशन दिएको छ। साथै, नेपाल प्रहरी प्रधान कार्यालय कल्याण महाशाखालाई समेत वित्तीय तथा भुक्तानी प्रणाली सोहीअनुसार व्यवस्थापन गर्न भनिएको छ।
यो व्यवस्थाले प्रहरी कर्मचारीको नियमित खर्च व्यवस्थापन र तलब वितरण प्रक्रियालाई थप व्यवस्थित बनाउने अपेक्षा गरिएको छ।
