काठमाडौं । नेकपा एमालेका प्रमुख सचेतक ऐन महरले वर्तमान सरकारलाई ‘जनतामारा र गरिबमारा सरकार को संज्ञा दिएका छन् । उनले सरकारले गरिबी न्यूनीकरण गर्ने भन्दा गरिबलाई नै विस्थापित गरेर समस्या समाधान गर्न खोजेको आरोप लगाएका छन् । नेपाल न्यूज बैंकसँगको विशेष संवादमा महरले विशेषगरी सुकुम्बासी व्यवस्थापनका नाममा सरकारले अपनाएको नीति अमानवीय, क्रुर र वर्गीय दृष्टिकोणबाट प्रेरित रहेको टिप्पणी गरे ।
उनले सरकारले सहरी सभ्यताका अवरोधक गरिब नागरिक नै हुन् भन्ने गलत सोचका आधारमा नीति बनाएको आरोप लगाउँदै भने, यो सरकार समग्रमा जनतामारा र गरिबमारा सरकार हो । यसले सहरी सभ्यताका अवरोधक गरिबहरू हुन् भन्ने बुझ्यो, जुन वर्गीय दृष्टिकोणले आफैंमा अत्यन्तै डरलाग्दो कुरा हो ।
महरका अनुसार सुकुम्बासीको सवालमा सरकारले देखाएको व्यवहारको कुनै सीमा र मापन नभएको भन्दै उनले सरकार गरिबहरूको नभई उनीहरूलाई विस्थापित गर्ने उद्देश्यमा केन्द्रित भएको बताए ।
कुराकानीमै उनले सुकुम्बासीका सन्दर्भमा सरकार यति अमानवीय र क्रुर बन्यो कि त्यसको कुनै सीमा र मापन नै छैन । यसबाट स्पष्ट हुन्छ, यो सरकार जनता वा गरिबहरूको सरकार होइन । उसले गरिबी निवारण होइन, गरिबलाई नै हटाएर समस्या समाधान गर्न खोज्यो । १५ हजार रुपैयाँ दिएर पन्छाउने जस्ता नीति गलत छन्, उनले भने ।
यतिबेला होल्डिङ सेन्टरमा राखिएका सुकुम्बासीलाई त्यहाँबाट समेत हट्न भनिएपछि उनीहरू आन्दोलनमा उत्रिएका छन् । पटक पटक स्थान छोड्न दबाब दिइँदा आफूहरू मानसिक तनावमा परेको उनीहरूको गुनासो छ । पुनःस्थापना नगरे पुरानै स्थानमा फर्केर छाप्रो हालेर बस्ने चेतावनी समेत उनीहरूले सरकारलाई दिएका छन् । यस विषयमा एमाले उनीहरूको साथमा रहेको स्पष्ट पार्दै महरले सुकुम्बासीको समस्या आवासको मात्र नभई सम्मान, जीविकोपार्जन र मौलिक अधिकारसँग जोडिएको विषय भएको बताए ।
यहाँ एउटा मानिसको स्वाभिमान, आत्मसम्मान र रोजीरोटीको कुरा छ । एक ठाउँमा बसोबास गरिसकेपछि उनीहरूले आफ्नै ढंगले व्यापार, व्यवसाय र पेसा गरिरहेका थिए । आज ती सबै कुरा छुटेका छन् । अपराधी र कैदीलाई जस्तै मनोमानी ढंगले समातेर आफूलाई मन लागेको ठाउँमा लगेर छोडिएको छ, अहिले त्यो ठाउँ पनि छोड्न आदेश दिइँदैछ, उनले भने ।
सरकारले नागरिकप्रति देखाएको यस्तो व्यवहार आपत्तिजनक, निन्दनीय र घोर भत्र्सनायोग्य रहेको उनको भनाइ छ ।
सरकारले जुन प्रकारको अमानवीय र क्रुर व्यवहार गरिरहेको छ, यो आपत्तिजनक, निन्दनीय र घोर भत्र्सनायोग्य छ । आज जो आम नागरिकहरू पीडा भोगिरहेका छन्, हामी उनीहरूको पक्षमा छौं । उनीहरूको पुनःस्थापना, स्वाभिमान र संवैधानिक अधिकार स्थापना गर्नका लागि एउटा नागरिकका हिसाबले हाम्रो पूर्ण साथ र सहयोग रहनेछ, महरले बताए ।
सरकारले सुकुम्बासी व्यवस्थापनका नाममा अवलम्बन गरेको नीतिप्रति प्रमुख प्रतिपक्षी दल एमालेले निरन्तर विरोध जनाउँदै आएको छ । पछिल्लो समय होल्डिङ सेन्टरमा रहेका सुकुम्बासीलाई समेत अन्यत्र जान भनिएपछि उनीहरूको आन्दोलन थप चर्किएको छ भने पुन स्थापना र स्थायी व्यवस्थापनको मागलाई लिएर सरकारमाथि दबाब बढ्दै गएको छ ।
