काठमाडौं— राष्ट्रिय खेलकुद परिषद् (राखेप) कार्यकारी समितिकी सदस्य सिक्का सुवाल श्रेष्ठले फ्रान्सको पेरिसमा आयोजना हुने पेरिस वर्ल्ड गेम्समा सहभागी हुन जाने स्वस्तिश्री गुरुकुल आईबी क्वान्टिन्यम स्कुलको टोलीलाई सफलताको शुभकामना व्यक्त गर्दै औपचारिक बिदाइ गरेकी छन्। आगामी असार २३ गतेदेखि सुरु हुने प्रतियोगितामा नेपालको प्रतिनिधित्व गर्न जाने टोली असार २१ गते फ्रान्स प्रस्थान गर्ने कार्यक्रम रहेको छ।
प्रतियोगितामा सहभागी हुने नेपाली टोलीमा साक्षत नेपाल, वाङ्दु दोर्जे गुरुङ, श्रियांश श्रेष्ठ, अर्नवराज भारती, आह्वान शाक्य, विहान खड्गी र लिसान श्रेष्ठ रहेका छन्। टोलीको प्रशिक्षकका रूपमा पुष्प बिष्ट (ज्वाला) रहेका छन्।
बिदाइ कार्यक्रममा राखेप सदस्य श्रेष्ठले अन्तर्राष्ट्रिय प्रतियोगितामा सहभागी हुन लागेको टोलीलाई सफलताको शुभकामना दिँदै प्रतियोगितामार्फत नेपालको खेल प्रतिभालाई विश्वमञ्चमा चिनाउने विश्वास व्यक्त गरिन्। उनले खेलाडीहरूले अनुशासन, आत्मविश्वास र उत्कृष्ट प्रदर्शनमार्फत देशको प्रतिष्ठा बढाउने अपेक्षा समेत व्यक्त गरिन्।
स्वस्तिश्री गुरुकुल आईबी क्वान्टिन्यम स्कुलका विद्यार्थीहरूको यस अन्तर्राष्ट्रिय सहभागिताले नेपाली खेल प्रतिभालाई विश्वस्तरमा परिचित गराउनुका साथै युवा खेलाडीहरूलाई अन्तर्राष्ट्रिय अनुभव हासिल गर्ने महत्वपूर्ण अवसर प्रदान गर्ने विश्वास गरिएको छ।
