काठमाडौं – सर्वोच्च अदालतबाट नक्कली भुटानी शरणार्थी प्रकरणमा ४ वर्ष कैद सजाय पाएका पूर्वउपप्रधानमन्त्री टोपबहादुर रायमाझी करिब १० महिनापछि जेलमुक्त हुने भएका छन्।
रायमाझी २०८० वैशाख ३१ गते पक्राउ परेका थिए। त्यसयता उनी पुर्पक्षका लागि थुनामा रहँदै आएका छन्। हालसम्म उनी करिब ३ वर्ष २ महिना हिरासत तथा थुनामा बिताइसकेका छन्।
कानुनी व्यवस्थाअनुसार अन्तिम कैद सजाय कार्यान्वयन गर्दा मुद्दाको सिलसिलामा यसअघि थुनामा बिताएको अवधि पनि कैद अवधिमै गणना गरिन्छ। सोही आधारमा रायमाझीले अब करिब १० महिना मात्र कैद भुक्तान गर्नुपर्ने देखिएको हो।
गत जेनजी आन्दोलनका क्रममा जेल ब्रेक भएपछि रायमाझी करिब १५ दिन जेलबाहिर रहेका थिए। पछि उनी स्वयं जेलमा फर्किएका थिए। उक्त अवधिको गणना कसरी हुने भन्ने विषय भने सम्बन्धित कारागार प्रशासनले प्रचलित कानुनअनुसार निर्धारण गर्नेछ।
यस्तै, सोही प्रकरणमा २ वर्ष कैद सजाय पाएका पूर्वगृहमन्त्री बालकृष्ण खाणले भने अझै करिब १ वर्ष ५ महिना जेल बस्नुपर्ने देखिएको छ।
खाण यसअघि करिब ७ महिना थुनामा बसेका थिए। पछि अदालतले उनलाई धरौटीमा रिहा गरेको थियो। अब सर्वोच्च अदालतको अन्तिम फैसलाअनुसार उनी थुनामा बसेको अवधि कटाएर बाँकी कैद सजाय भुक्तान गर्नुपर्नेछ।
यस हिसाबले अदालतको फैसला कार्यान्वयन हुँदा बालकृष्ण खाणभन्दा टोपबहादुर रायमाझी पहिले जेलमुक्त हुने देखिएको छ।
