काठमाडौं। काठमाडौं र धादिङलाई जोड्ने नागढुङ्गा–सिस्नेखोला सुरुङमार्ग सोमबार औपचारिक रूपमा उद्घाटन गरिएको छ। करिब २९ अर्ब रुपैयाँ लागतमा निर्माण भएको यो नेपालकै पहिलो व्यवस्थित सडक सुरुङमार्ग हो।
पूर्वाधार विकासमन्त्री सुनील लम्सालले नेपालका लागि जापानी राजदूत मायदा तोरु र जाइका अध्यक्ष डा. तानाका अकिहिकोको उपस्थितिमा सुरुङमार्ग उद्घाटन गरेका हुन्।
सुरुआती चरणमा एम्बुलेन्स तथा अन्य आपतकालीन सवारीसाधनलाई मात्र सुरुङ प्रयोग गर्न दिइनेछ भने परीक्षणपछि निजी र सार्वजनिक सवारीसाधनका लागि क्रमिक रूपमा सञ्चालन खुला गरिनेछ।
उद्घाटन समारोहमा पूर्वाधार विकास मन्त्रालयका सचिव गोपालप्रसाद सिग्देलले सुरुङमार्गलाई नेपालको पूर्वाधार विकासमा नयाँ युगको सुरुवात भएको उल्लेख गर्दै यसले नागढुङ्गा सडकखण्डको ट्राफिक जाम, घुमाउरो सडक र पहिरोको जोखिम घटाएर यात्रालाई सुरक्षित र छिटो बनाउने बताए।
जापान सरकारको सहुलियतपूर्ण ऋण सहयोग र नेपाल सरकारको लगानीमा निर्माण भएको यो आयोजना २०७६ कात्तिक ४ गते शिलान्यास गरिएको थियो।
