काठमाडौं – कृषि, वन तथा पर्यावरणमन्त्री गीता चौधरीले वन्यजन्तु अपराध संगठित, अन्तरदेशीय र जटिल बन्दै गएकाले यसको नियन्त्रणका लागि दक्षिण एसियाली मुलुकबीच क्षेत्रीय सहकार्य आवश्यक रहेको बताउनुभएको छ।
दक्षिण एसियाली वन्यजन्तु कानून कार्यान्वयन सञ्जाल (SAWEN) को प्रथम महासभालाई सम्बोधन गर्दै मन्त्री चौधरीले वन्यजन्तु अपराध कुनै एक देशको सीमाभित्र मात्र सीमित नरहेकाले सूचना आदानप्रदान, अनुभव तथा क्षमता अभिवृद्धि र संयुक्त प्रयास आवश्यक रहेको बताउनुभयो।
उहाँले वन्यजन्तु तस्करीले जैविक विविधता, पारिस्थितिक प्रणाली, स्थानीय जीविकोपार्जन, राष्ट्रिय सम्पदा र कानुनी शासनमा समेत असर पार्ने भएकाले यसलाई वातावरणीय विषयका रूपमा मात्र लिन नहुने बताउनुभयो।
नेपालमा SAWEN को सचिवालय रहेको उल्लेख गर्दै मन्त्री चौधरीले सञ्जाल सबै आठ सदस्य राष्ट्रको साझा संस्था भएको बताउनुभयो। SAWEN मा नेपालसहित अफगानिस्तान, बंगलादेश, भुटान, भारत, माल्दिभ्स, पाकिस्तान र श्रीलंका सदस्य छन्।
प्रथम महासभाले सञ्जालको संस्थागत विकास, कार्यक्रमका प्राथमिकता, भावी कार्ययोजना, सदस्यता, वित्तीय दिगोपन र क्षेत्रीय सहकार्यलगायत विषयमा छलफल गरी आगामी कार्यदिशा तय गर्ने उहाँले बताउनुभयो।
मन्त्री चौधरीले वन्यजन्तु संरक्षण सरकार मात्र नभई सम्पूर्ण समाजको साझा जिम्मेवारी भएको उल्लेख गर्दै सदस्य राष्ट्रबीचको सहकार्यलाई व्यवहारिक परिणाममा रूपान्तरण गर्नुपर्नेमा जोड दिनुभयो।
