काठमाडौं – नेपाली सेनाले बेलायतमा सम्पन्न अन्तर्राष्ट्रिय सैनिक अभ्यास तथा प्रतियोगिता ‘एक्सरसाइज क्यामब्रियन पट्रोल २०२६’ मा स्वर्ण पदक हासिल गरेको छ।
बेलायतको वेल्सस्थित ब्रेकनमा असोज २१ देखि २२ गतेसम्म सञ्चालन भएको प्रतियोगितामा नेपाली सेनाको टोलीले उत्कृष्ट प्रदर्शन गर्दै स्वर्ण पदक जितेको हो।
संयुक्त अधिराज्य बेलायतको औपचारिक भ्रमणमा रहनुभएका प्रधान सेनापति महारथी अशोक राज सिग्देलको समुपस्थितिमा प्रतियोगिताको पदक वितरण गरिएको थियो। प्रतियोगितामा बेलायतसहित ३५ राष्ट्रका १३० टोलीको सहभागिता रहेको थियो।
सन् १९६० देखि प्रत्येक वर्ष आयोजना हुँदै आएको ‘क्यामब्रियन पट्रोल’ मा नेपाली सेना सन् २०१४ देखि सहभागी हुँदै आएको छ। नेपाली सेनाले यसअघि सन् २०१७, २०१९, २०२४ र २०२५ मा समेत स्वर्ण पदक हासिल गरिसकेको छ।
प्रतियोगितामा सहभागी टोलीले करिब ७० पाउण्ड तौल बराबरका उपकरण बोकेर ४० माइल दूरी दुई दिनभित्र पार गर्नुपर्ने हुन्छ। यस क्रममा हतियार सञ्चालन, सूचना सङ्कलन, घाइते तथा बिरामीको व्यवस्थापनलगायत विभिन्न सैनिक सीप तथा क्षमताको परीक्षण गरिन्छ।
यस वर्षको स्वर्ण पदकसँगै नेपाली सेनाले अन्तर्राष्ट्रिय स्तरको उक्त कठिन सैनिक अभ्यासमा आफ्नो निरन्तर उत्कृष्ट प्रदर्शनलाई कायम राखेको छ।
