- अजय लेन्सम्यान
काठमाडौं – आइतबार नेपालमा सूर्य ग्रहण देखियो । यो ग्रहण वास्तवमा वलय सूर्य ग्रहण भए तापनि नेपालबाट खण्डग्रास सूर्य ग्रहण मात्र देखिएको हो । यो ग्रहण वलय (पुरै सूर्य ढाक्ने) सूर्यग्रहण भए पनि नेपालबाट खण्डग्रास (केही भाग) मात्र देखिएको थियो ।
ग्रहणका समयमा स्नान, दान, श्राद्ध, जप, ध्यान, साधनालगायत कर्म गर्न शुभ मानिन्छ। ग्रहणका बेला सकेसम्म तीर्थस्थलमा नसके नजिकको नदी, ताल, तलाउ, पोखरीमा र यति पनि सम्भव नभए घरमै स्नान गर्नुपर्ने निर्णयसिन्धु, हेमाद्रि, कालमाधव, वीरमित्रोदयलगायत धार्मिक ग्रन्थमा उल्लेख गरिएको छ ।
यस ग्रहणलाई कंगो, इथियोपिया, दक्षिणी सुडान, मस्कट, यमन, ओमान, पाकिस्तानको दक्षिणी भाग, भारतको देहरादून, कुरुक्षेत्र, चीनको तिब्बत, आदि ठाउँबाट वलय सूर्य ग्रहण देखिएको थियो ।
नेपालकै भूभाग लिम्पियाधुरा, लिपुलेक तथा कालापानी क्षेत्रबाट सबैभन्दा धेरै ९८ प्रतिशतसम्म सूर्य ढाकिएको देखिएको थियो भने काठमाडौंबाट ८८ प्रतिशत मात्रै सूर्य ढाकिएको देखियो ।
आइतबार नेपालमा बिहान १० बजेर ५५ मिनेटबाट सूर्य ग्रहण सुरु भई अपरान्ह २ बजेर २४ मिनेटमा समाप्त भएको थियो ।
