काठमाडौँ – हिन्दु महिलाको महानपर्व हरितालिका तीज नजिकिएसंगै तीजका गीतहरु दुई तीन महिनादेखि बजारमा आउने क्रम जारी छ ।
तीजमा रातो, हरियो, पहेँलो रङको पहिरन र चुरापोतेमा सजिनुको धार्मिक महत्त्व छ। वर्षभरीको दुख, पिर र व्यथालाई भुलेर रमाउने नाच्ने र माइतीघरमा गएर मनको बह पोख्ने पर्वका रुपमा पनि तिज पर्वलाई लिने गरिन्छ । विवाह गरेर गएको घरमा आफूले पाएको पीडा र बेदनालाई पोख्ने मुख्य पर्व पनि तीज हो ।
आजभोलि तीजकै नाउँमा भड्काउ गीत थुप्रै बनेका छन्। कुनैकुनै तीज गीत परिवारसँगै बसेर हेर्न र सुन्नसमेत नसकिने खालका छन्। उत्ताउलो पहिरन, पश्चिमी शैलीको नृत्य, म्युजिक भिडियोमा गरिने अभिनय पनि त्यति नै अराजक हुँदा तीज गीत नै हो भन्न सकिने अवस्था छैन।
तर सञ्चारकर्मी तथा कलाकार कल्पना रेग्मीको महिलाको पिडा वेदना पोखिएको मौलिक गीत ‘अत्याचार’ सार्वजनिक गरेकी छन् । गीतमा रेग्मीको शब्द तथा संगीत रहेको छ।
रेग्मीको गीतमा माइती जान नपाएको दुःख अनि श्रीमान् र परिवारबाट हेलाँ गरेको प्रसंग छन्। जुन दुर्गम गाउँ समाजमा अझै कायमै छ।
गायिका शर्मिला गुरुङको स्वर रहेको गीतमा माइती घरमा लाड्ली छोरीलाई बिहेपछि श्रीमान पराइ केटीसँग लागेपछि छोराछोरी र आफूलाई हेला गरेको कथा देखाइएको छ । गीतकार स्वयम् कल्पना रेग्मी, संगम भण्डारी, सरोज दाहाल र सुबेक्षा रेग्मीलगायतको अभिनय रहेको छ । गीतलाई सरोज दाहालले निर्देशन गरेका हुन् । गीत रेग्मीकै अफिसियल युट्युवमार्फत सार्वजनिक गरिएको छ ।
हेर्नुहोस् भिडियो
