काठमाडौं – विशेष अदालत काठमाडौंले नेपाली कांग्रेसका उपसभापति विजयकुमार गच्छदारलाई १५ दिनभित्र अदालतमा उपस्थित हुन आदेश दिएको छ ।
पूर्वउपप्रधानमन्त्री गच्छदारलाई ललिता निवासको सरकारी जग्गा हिनामिना प्रकरणमा अदालतले १५ दिनभित्र अदालतमा उपस्थित हुन म्याद जारी गरेको हो ।
अख्तियार दुरुपयोग अनुसन्धान आयोगले गच्छदारविरुद्ध ९ करोड ६५ लाख ७६ हजार रुपैयाँ बिगो र ८ देखि १० वर्ष कैद सजांय माग दाबी गरेर विशेष अदालतमा आरोप पत्र दायर गरेको थियो । अख्तियारले ललिता निवास प्रकरणमा प्रतिवादी बनाएका पूर्वमन्त्रीद्वय डम्बर श्रेष्ठ, छविराज पन्त, अख्तियारका पूर्वप्रमुख आयुक्त दीप बस्न्यातविरुद्ध पनि १५ दिने म्याद जारी गरेको छ । पन्त र बस्न्यातले सचिव हुँदा भ्रष्टाचार गरेको अख्तियारको आरोप पत्रमा उल्लेख छ ।
अदालतले भूमिसुधार तथा व्यवस्था विभागका पूर्व निर्देशकद्धय पुष्पराज उपाध्याय, रुद्रकुमार श्रेष्ठ र मुकुन्द आचार्य, मालपोत कार्यालय डिल्लीबजारका पूर्वप्रमुखद्वय टीकाराम घिमिरे र कलाधर देउजा, शाखा अधिकृत इन्द्रप्रसाद ढुंगानालगायतका नाममा म्याद जारी गरिसकेको छ ।
अख्तियारले गत माघ २२ गते पूर्वउपप्रधानमन्त्री गच्छदारसहित १७५ जना विरुद्ध विशेष अदालतमा आरोप पत्र दायर गरेको थियो । उनीहरू मध्ये ७४ जनाको नाममा म्याद जारी भएको विशेष अदालतका उपरजिस्ट्रर इन्द्रकुमार खड्काले जानकारी दिए ।
