रामेछाप – रामेछापका दुई स्थानीय तहमा कोरोना संक्रमण हुन नदिनका लागि संचालित कृयाकलापहरुको आईतबार जिल्ला स्तरिय अनुगमन समितिबाट अनुगमन भएको छ ।
प्रमुख जिल्ला अधिकारी रुद्रादेवि शर्माको नेतृत्वमा गएको अनुगमन समितिले खाँडादेवि र सुनापति गाउँपालिकामा भएका पूर्व तयारी र सावधानिका कार्यहरुका बारेमा अनुगमन गरेको थियो । खाँडादेवि गाउंपालिका र सुनापति गाउंपालिकामा स्थापना गरीएका आईसुलेसन र क्वारेन्टाइन कक्षको अवलोकन गर्नुका साथै जनप्रतिनिधि र स्वास्थ्यकर्मीहरुका विच अन्तरक्रिया गरिएको थियो ।
अन्तरक्रियाका क्रममा काठमाण्डौं र बाहिरी जिल्लाबाट घर फर्केकाको अवस्था, उनिहरु माथि गरिएको निगरानी, दैनिक उपभोग्य सामाग्रिको अवस्था र राहत वितरणको कार्यमा भएका गतिविधिहरुका बारेमा समेत छलफल भएको थियो ।
दुवै गाउंपालिकाका प्रमुख लगाएतका जनप्रतिनिधिले कृषि उत्पादनलाई जोड दिदै उत्पादित कृषि उपज विक्री नभए वजारको ग्यारेन्टी गरेको, घर फर्केकाहरुको विवरण अद्यावधिक रहेको र उनिहरुलाई घर भन्दा बाहिर नजान र गई हाले आफ्नो कृषि कार्यका लागि सिमितमा राखिएको, ठुला भेला र छलफल नभएका वताएका थिए ।
सुनापति गाउंपालिकाले स्वास्थ्य उपकरणमा जिल्लामै पहिलो पटक ३ वटा भेन्टीलेटर खरिद गर्ने निर्णय गरेको अध्यक्ष धावा लामाले वताए । उनले गाउंमा दैनिक खाद्य सामाग्री सहकारी मार्फत ल्याएर विक्री वितरणको थालनि गरेको वताए । खाँडादेवि गाउँपालिकाका अध्यक्ष प्रेमवहादुर तामाङले गाउंपालिकामा भित्रीएका स्थानीयहरु बालीनाली लगाउनका लागि लागेको वताए । उनले खाद्यान्नको संकट भईनसकेकोले राहत वितरण नगरिएको वताए ।
खाँडादेविमा कोरोनाको संक्रमण भइहालेमा तत्काल अस्पतालको शैया वनाउनका लागि प्रयाप्त बेड र टेण्टहरु तयारी अवस्थामा राखिएको र केहि खाद्यान्न समेत स्टक रहेको अध्यक्ष तामाङले वताए । दुवै गाउँपालिकामा रोकिएका विकास निर्माणका कार्यहरु अव संचालन गर्नुपर्नेमा जोड दिइएको थियो ।
अनुगमनका लागि जिल्लाका सुरक्षा निकायका प्रमुखहरु, स्वास्थ्य कार्यालयका प्रमुख र पत्रकारहरुको सहभागिता रहेको थियो ।
