काठमाडौं – संस्कृति, सम्पदा र पर्यटन प्रवर्द्धनका लागि नेपाल आएका एक सयभन्दा बढी चिनियाँ फोटोग्राफरले काठमाडौंको ऐतिहासिक बसन्तपुर दरबार क्षेत्रमा नेपाली फोटो पत्रकारहरूसँग होली पर्व मनाएका छन्।
चाइना नेपाल फ्रेन्डसिप फोरम र राष्ट्रिय फोटो पत्रकार समूहको संयोजनमा आयोजित यस विशेष कार्यक्रमले नेपाल–चीन मैत्री सम्बन्धलाई थप सुदृढ बनाउनुका साथै नेपालको पर्यटन प्रवर्द्धनमा महत्वपूर्ण योगदान पुर्याउने विश्वास गरिएको छ।
फोरमका संयोजक डा. कल्याणराज शर्मा का अनुसार, नेपाल भ्रमण वर्ष २०२५ तथा नेपाल–चीन कूटनीतिक सम्बन्धको ७०औँ वार्षिकोत्सवको अवसरमा चिनियाँ फोटोग्राफरहरूलाई आमन्त्रण गरिएको हो। उनीहरूले नेपालका विभिन्न पर्यटकीय, सांस्कृतिक, तथा ऐतिहासिक स्थलहरूको भ्रमण गर्दै यहाँको प्राकृतिक सौन्दर्य र सांस्कृतिक सम्पदालाई फोटोमार्फत विश्वभर प्रवर्द्धन गर्नेछन्।
राष्ट्रिय फोटो पत्रकार समूहका अध्यक्ष प्रदीपराज वन्त ले फागुपूर्णिमाको अवसरमा चिनियाँ फोटोग्राफरहरूलाई नेपालका विभिन्न स्थानमा रंगमय फोटोग्राफी गर्न विशेष प्रबन्ध मिलाइएको जानकारी दिए।
यस कार्यक्रमले नेपाल–चीन सम्बन्धलाई अझ सुदृढ बनाउनुका साथै नेपालको संस्कृति, परम्परा, जीवनशैली, तथा ऐतिहासिक सम्पदाहरूलाई विश्वभर प्रचार गर्ने अवसर प्रदान गर्नेछ। पर्यटन प्रवर्द्धनका दृष्टिले यस्तो प्रकारका कार्यक्रमहरूले नेपाललाई नयाँ उचाइमा पुर्याउने अपेक्षा गरिएको छ।
