काठमाडौँ – पत्रकार नवराज कुँवर नेशनल नोजा अनर अवार्डबाट सम्मानित भएका छन् । राष्ट्रिय अनलाइन पत्रकार संघ (नोजा) को एघारौँ वार्षिकोत्सवका अवसरमा शुक्रबार काठमाडौंको बालुवाटारमा आयोजित कार्यक्रममा मल्टिमिडियामार्फत अनलाइन पत्रकारिताको गरिमा र विश्वसनीयता बढाउन भूमिका निभाएकोमा कुँवरलाई सम्मानित गरिएको हो ।
नेपाल राष्ट्र बैंकका पूर्वगभर्नर डा. चिरञ्जिवी नेपालले कुँवरलाई प्रमाणपत्र प्रदान गरे ।
गतवर्ष कुँवर डिजिटल मिडिया, नेसनल क्यापिटललगायत अवार्डबाट सम्मानित भएका थिए । डेढ दशकदेखि पत्रकारिता गरिरहेका उनी ५ वर्षयता शिलापत्र डटकममा आवद्ध छन् । पछिल्लो समय मल्टिमिडियामा उनको भिडियो एक्सप्लेनरहरू दर्शकले रुचाएका छन् । सोसल मिडियामा फैलिएका मिथ्या सूचनाको वास्तविकता आम मानिसले बुझ्ने शैलीमा भन्न र युट्युबलगायत मिडियाकै विकृति निर्भयसाथ भण्डाफोर गर्न पत्रकार कुँवर अब्बल देखिएका छन् ।
