काठमाडौं – प्रधानमन्त्री बालेन्द्र शाह ले भक्तपुरको खरिपाटीस्थित नेपाली सैनिक प्रतिष्ठानमा सञ्चालित अधिकृत क्याडेट तालिमका सहभागीहरूलाई आयुक्त पद प्रदान गरेका छन्। उक्त अवसरमा आयोजित आयुक्त पद प्रदान कवाज समारोहमा उनले उत्कृष्ट क्याडेटहरूलाई श्रेष्ठताको प्रतीक खुकुरी तथा छडीद्वारा पुरस्कृत गरे।
समारोहलाई सम्बोधन गर्दै प्रधानमन्त्री शाहले मातृभूमि र जनताप्रति समर्पित रहने दृढ सङ्कल्पका साथ कठिन तालिम पूरा गरी आयुक्त पद प्राप्त गर्न सफल भएकोमा नवआयुक्त अधिकृतहरूलाई बधाई दिए। उनले सैनिक आचरण, चेन अफ कमान्ड र अनुशासनको दायराभित्र रही आफ्नो जिम्मेवारी र दायित्वप्रति सदैव सजग र कर्तव्यनिष्ठ रहनुपर्नेमा जोड दिए।
कार्यक्रममा सि.सं. ६३ अधिकृत क्याडेट, सि.सं. ५ स्नातक अधिकृत क्याडेट र सि.सं. ५३ पदिक तथा बिल्लादार अधिकृत आधार तालिमका गरी जम्मा १८३ जना क्याडेटहरूले आयुक्त पद प्रदान कवाज प्रदर्शन गरेका थिए।
यस अवसरमा प्रधान सेनापति महारथी अशोक राज सिग्देल ले मित्रराष्ट्र केन्या र जाम्बियाबाट तालिममा सहभागी तीन जना शिक्षार्थी अधिकृत क्याडेटहरूलाई ‘Nepali Military Academy (NMA) Medallion’ प्रदान गरेका थिए।
नेपाली सैनिक प्रतिष्ठानबाट हालसम्म अधिकृत तथा पदिक–बिल्लादार अधिकृत क्याडेट गरी ६ हजार ७३४ जना र १ हजार ६०८ जना प्राविधिक अधिकृतहरूले सफलतापूर्वक तालिम सम्पन्न गरिसकेका छन्। सन् २०१२ देखि विदेशी शिक्षार्थीहरूलाई समेत समेटेर तालिम सञ्चालन हुँदै आएकोमा हालसम्म ३२ जना विदेशी क्याडेटहरूले तालिम पूरा गरेका छन्।
समारोहमा नवआयुक्त अधिकृतहरूलाई अभिभावक तथा आफन्तजनले सुशोभन गरेका थिए।
