सशस्त्र प्रहरी बल (एपीएफ) को इन्टेलिजेन्स ब्युरोले काठमाडौं महानगरपालिका–१ नागपोखरी क्षेत्रमा सञ्चालन गरेको विशेष अपरेशनमा २९६.७५ ग्राम खैरो हेरोइनसहित चार जनालाई पक्राउ गरेको छ। पक्राउ परेकामध्ये एक जना लागूऔषध मुद्दाका फरार अभियुक्त रहेको खुलेको छ।
एपीएफका अनुसार लागूऔषध भण्डारण तथा कारोबार भइरहेको भन्ने विशेष सूचनाका आधारमा सशस्त्र प्रहरी नायब उपरीक्षक सुवर्ण थापा र सशस्त्र प्रहरी निरीक्षक रबिन्द्र भट्ट नेतृत्वको टोलीले सोमबार दिउँसो करिब १२ः३० बजे छापा मारेर चार जनालाई नियन्त्रणमा लिएको हो।
पक्राउ पर्नेमा काठमाडौं महानगरपालिका–१ नागपोखरीका ४३ वर्षीय प्रभात तिवारी, सर्लाहीको मलंगवा नगरपालिका–८ का सुजन रायमाझी, काठमाडौं महानगरपालिका–१४ बल्खुका भूपेन्द्र श्रेष्ठ तथा ललितपुर महानगरपालिका–४ बागडोलका ५१ वर्षीय सविन श्रेष्ठ रहेका छन्।
प्रारम्भिक अनुसन्धानका क्रममा प्रभात तिवारी लागूऔषध सम्बन्धी मुद्दाका फरार अभियुक्त रहेको खुलेको एपीएफले जनाएको छ। पक्राउ परेका चारै जनालाई थप अनुसन्धान तथा कानुनी कारबाहीका लागि नेपाल प्रहरीलाई बुझाउने प्रक्रिया अघि बढाइएको छ।
कारबाहीका क्रममा प्रहरीले २९६.७५ ग्राम खैरो हेरोइन, बा ७ च ५१८० नम्बरको होन्डा कार, ट्रामाडोल २२० क्याप्सुल, नाइट्रोभेट १३० क्याप्सुल, चार थान एन्ड्रोइड मोबाइल, तीन थान ल्यापटप, एक थान प्रिन्टर, दुई थान सञ्चार सेट तथा लागूऔषधमा मिसाउन प्रयोग हुने २२ वटा रासायनिक पदार्थ (केमिकल) का बोतल बरामद गरेको जनाएको छ।
त्यसैगरी, एक लाख ९८ हजार ३७५ रुपैयाँ नगद, ३३ अमेरिकी डलर, २० भारतीय रुपैयाँ र एक हजार जापानी येन समेत बरामद भएको छ।
एपीएफ इन्टेलिजेन्स ब्युरोका अनुसार पछिल्लो एक महिनायता काठमाडौं उपत्यकामा सञ्चालन गरिएका विशेष अपरेशनमार्फत विभिन्न स्थानबाट लागूऔषध कारोबारी पक्राउ परेका छन् भने ठूलो परिमाणमा लागूऔषध बरामद गरिएको छ। घटनाबारे थप अनुसन्धान जारी रहेको एपीएफले जनाएको छ।
