काठमाडौं – बजेटका प्राथमिकतामाथिको छलफलका क्रममा अर्थमन्त्री स्वर्णिम वाग्ले अनुपस्थित रहेको भन्दै रास्वपाकै सांसद डा. अमरेश कुमार सिंहले सरकारको कार्यशैलीप्रति कडा असन्तुष्टि जनाएका छन्।
प्रतिनिधिसभाको बैठकमा बोल्दै उनले बजेटका प्राथमिकतामाथि छलफल हुँदा अर्थमन्त्री उपस्थित रहने संसदीय परम्परा रहेको उल्लेख गर्दै यसपटक त्यो परम्परा तोडिएको बताए।
उनले भने, “परम्परा तोड्ने नाममा सबै परम्परा तोडिदिने ? बजेटका प्राथमिकतामाथि छलफल हुँदा अर्थमन्त्री जहिले पनि बस्ने व्यवस्था छ। पछिल्लो २० वर्षदेखि पहिलो पटक अर्थमन्त्रीबिनाको छलफल देख्दै छु। नयाँको नाममा सबै कुरा भत्काउने भए सिंहदरबार, प्रधानमन्त्री र मन्त्री पद पनि भत्काउ।”
सांसद सिंहले मधेशलाई सरकारले प्राथमिकतामा नराखेको आरोपसमेत लगाए। मधेशबाट सबैभन्दा बढी मत पाएर सरकार बनेको उल्लेख गर्दै उनले मधेशका लागि विशेष प्याकेजको अपेक्षा गरिएको बताए।
उनले भने, “यो सरकारमाथि मधेशको पनि अधिकार छ। प्रत्यक्ष र समानुपातिक दुवैतर्फ सबैभन्दा बढी मत मधेशले दिएको छ। तर मधेशलाई समेट्न सकिएको छैन।”
उनले मधेशमा असन्तुष्टि बढ्दो अवस्थामा रहेको उल्लेख गर्दै समयमै सम्बोधन गर्न सरकारलाई आग्रह गरे। “मधेश विस्फोटको स्थितिमा छ। त्यो विस्फोट हुनुभन्दा पहिला समाधान गर्नुस्,” उनले चेतावनी दिए।
सिंहले सत्ता र नियुक्तिमा समेत मधेशी समुदायको उपस्थिति कमजोर रहेको भन्दै यसरी राज्य सञ्चालन गर्न नसकिने टिप्पणी गरे।
