काठमाडौं – काठमाडौंमा एक १५ बर्षीया किशोरी ड्राइभर ग्याङ (चालक र सहचालक) को सामूहिक बलात्कारको शिकार भएकी छन् । काठमाडौंको कीर्तिपुरबाट बसमा चढेकी बौद्धिक अपाङ्गता भएकी किशोरी ‘ड्राइभर ग्याङ’ को पटक पटक बलात्कारको शिकार भएकी हुन् ।
फागुन १७ गते साँझ घरबाट निस्किएकी किशोरीमाथि बा २ ख ४५९५ नम्बरको गाडीका चालक र सहचालक सहितकाले पटक पटक बलात्कार गरेका हुन् । उनी ६ दिनसम्म ती चालक र सहचालकको शिकार बनिन् ।
उनीहरुको कब्जामा रहेकी किशोरी एक पटक भाग्न खोज्दा सहचालकको फन्दा परेकी थिईन् । सहचालकले समातेर फेरि कोठामा लगेर बलात्कार गरेको प्रहरीले जनाएको छ ।त्यस्तै उक्त समूहले अर्को समूहको जिम्मा लगाएर फेरि त्यहा पनि बलात्कारको शिकार बनेकी काठमाडौं प्रहरी परिसरका प्रहरी नायब उपरीक्षक (डिएसपी) मोहन थापाले जानकारी दिए ।
उक्त समूहले बा ४ ख ३८५१ नम्बरको गाडीको चालकलाई हस्तान्तरण गरेका थिए । उक्त गाडिका चालकले पनि दिनभर किशोरीलाई गाडीमा हालेर घुमाएर साँझ स्वयम्भूस्थित एक ग्यारेजमा लगेर सामुहिक बलात्कार गरेको खुल्न आएको डिएसपी थापाको भनाई छ ।
पटक पटक ड्राईभर ग्याङबाट बलात्कारको शिकार बनेकी किशोरीलाई गर्भ निरोधक औषधी खुवाउँनुका साथै अढाइ सय रुपैयाँ दिएर छाडेका थिए । उक्त सामूहिक बलात्कार काण्डमा संलग्न रहेको आरोपमा प्रहरीले चालक र सहचालकलाई पक्राउ गरेको छ ।
सुरुमा प्रहरीले बा २ ख ४५९५ को चालक भोला तामाङ र चन्द्र सापकोटालाई पक्राउ गरेको थियो । त्यस्तै अर्का गाडीका चालक गड्तौला गौशाला र फरार भएका सहचालक सन्तोष घिमिरे झापाको बिर्तामोडबाट पक्राउ परेका छन् । घटनामा संलग्न एक जना फरार रहेको र उनको खोजी कार्य भईरहेको डिएसपी थापाले बताए ।
