- फोटो : सरन महर्जन, भिडियो : धमिन महर्जन
काठमाडौँ — खुडोल फाँटमा शनिबार खोकनावासीले सांकेतिक विरोध गरेका छन् । उनीहरुले धान रोपेर र भटमासको बिउ छर्दै सांकेतिक रुपमा विरोध जनाएका हुन् ।
उचित मुआब्जा नपाएको भन्दै दु्रतमार्गको विरोधमा उत्रिएका खोकना, बुंगमतिका स्थानीयले खोकनामै बन्न लागिएका अन्य योजनाहरु स्मार्ट सिटी, रेल मार्ग, १३३ केभीको बिद्युतीय प्रशारण लाईन, बागमती कोरिडोरको एक साथ विरोध गर्दै आएका छन् । दु्रतमार्गको वातावरणीय प्रभाव मुल्यांकनको सार्वजनिक सुनुवाईदेखि खोकनालाई दु्रतमार्ग चाहिँदैन भन्दै आएका स्थानीयले अझै विरोध गर्न पनि छोडेका छैनन् ।
‘सम्पदा र नेवा सँस्कृति मासिने गरी विस्तार हुन लागिएको फाष्टट्रयाकलगायत अन्य योजना खोकनालाई स्विकार्य छैन । हामी राज्य शान्ति पूर्ण आन्दोलन गर्छौँ । राज्यले सुन्नु पर्छ ।’, एक स्थानियले बताए।
यसअघि खुडोल फाँटमा धान रोप्न जाँदा प्रहरी र स्थानीयबीच झडप हुँदै आएको थियो । खुडोल क्षेत्रमा शनिबार प्रहरीको उपस्थिती नभएपछि खोकनावासीले धान रोपेका हुन् ।
खुडोल फाँट काठमाडौं–तराई जोड्ने द्रुतमार्ग (फास्ट ट्रयाक) को ‘जिरो किलोमिटर’हो । सो क्षेत्रको जग्गा सरकारले अधिग्रहण गरेको छ । तर, स्थानीयले भने मुआब्जा लिइसकेका छैनन् ।
उनीहरुले सरोकारवालासँग छलफल नै नगरि एकलौटी ढंगबाट तयार गरेको मुआब्जा स्वीकार नभएको, फास्ट ट्रयाकसँगै वाग्मती करिडोर, १ सय ३३ केभी प्रसारण लाइन, बाहिरी चक्रपथको विन्दु पनि खोकना फाँटमै पर्ने भएकाले मौलिक बस्तीको अस्तित्व सखाप हुने भन्दै विरोध जनाउँदै आएका छन् ।
ती समूह दु्रतमार्गको निर्माण सामाग्री राखिएको जस्ताको टहरो भत्काउन तिर लागे । केहीले जस्ता, रड लगायतका निर्माण सामाग्री नजिकैको बागमती नदीमा बगाए । कोहीले शान्तिपूर्ण आन्दोलनमा यस्तो नगर भन्दै ती समूहलाई सम्झाए त्यसपछि रोकिए । केही बेरमै प्रदर्शनकारी बाटो लागे ।
