डम्बर निदाल
डडेल्धुरा -डडेल्धुरामा आज बिहिबारदेखि जिल्लाव्यापी रूपमा लागू हुने गरी आंशिक लकडाउन अर्थात बन्दाबन्दी शुरु भएको छ । भने मोटरसाईकलमा जोरबिजोर लागु गरीएको र तिज र गौरा पर्व मनाउन रोक लगाईएको छ ।
जिल्ला स्तरीय कोभिड–१९ संकट व्यवस्थापन केन्द्रको बुधबार बसेको बैठकले बिहीबारदेखि लागू हुने गरी डडेल्धुरा जिल्लालाई एक साता बढी आंशिक लकडाउन गरिएको हो ।
जिल्लामा संचालित अतिआवश्यक सेवा तथा बस्तुहरु बिक्री वितरण गर्ने पसलहरू बाहेक अन्य सम्पूर्ण पसलहरू बिहीबारदेखि यहि भदौ १२ गतेसम्मका लागि बिहान ५ बजेदेखि ९ बजेसम्म र बेलुका ५ बजेदेखि साँझ ७ बजेसम्म मात्रै संचालन गर्न पाउने निर्णय गरेको छ ।
बजार क्षेत्रमा रहेको मानिसहरूको चहलपहल र भिडभाडलाई कम गर्न जिल्लामा संचालित हुने मोटरसाइकलहरूलाई बिहीबारदेखि नै जोर–बिजोर प्रणाली लागू गरिने सहायक प्रमुख जिल्ला अधिकारी बाबुराम अर्यालले जानकारी दिए ।
यसै गरी तिज तथा गौरा पर्व मनाउन रोक लगाईएको छ । हिन्दु महिलाहरूको महान पर्व हरितालिका तिज तथा सुदूरपश्चिमेलीको मुख्य पर्वका रूपमा रहेको गौरा पर्व मनाउन रोक लगाइएको हो ।
कोरोना भाइरस जोखिम न्यूनीकरणका लागि भिडभाड नहुने गरी चाडपर्व मनाउन जिल्ला स्तरीय कोभिड संकट व्यवस्थापन केन्द्रले आग्रह गरेको छ । नजिकिदै आइरहेका तिज, गौरा पर्व लगायतका अन्य धार्मिक साँस्कृतिक कार्यक्रमहरू जिल्लामा सार्वजनिक रूपमा मनाउन निषेध गरिएको छ ।
नृत्यपूजा र घरायसी पूजा बाहेक सामूहिक रूपमा गौरा र तिज जस्ता पर्व मनाउदा कोरोनाको जोखिम बढ्ने भएकाले सामूहिक रूपमा चाडपर्व मनाउन रोक लगाइएको हो ।
जिल्ला प्रशासन कार्यालयले सवारी पास वितरण यसअघि नै बन्द गरिसकेको छ । प्रशासनले एक जिल्लाबाट अर्को जिल्लामा जानका लागि वितरण गर्दै आएको सवारी पास साउन २९ देखि बन्द गरेको थियो ।
निर्णयको उल्लंघन हुने क्रियाकलाप कसैबाट भए गरेमा संक्रामक रोग ऐन, २०२० तथा अन्य प्रचलित कानुन बमोजिम कारबाही गरिने प्रशासन कार्यालयले जनाएको छ ।
