काठमाडौँ- प्रमुख प्रतिपक्षी नेपाली कांग्रेसले विदेशमा अलपत्र नेपालीलाई सरकारी खर्चमै उद्धार गर्न सरकारको ध्यनाकर्षण गराएको छ । गत असार १ गते सर्वोच्च अदालतले समेत वैदेशिक रोजगारीमा गएर अप्ठ्यारोमा परि नेपाल आउन चाहेका नेपाली नागरिकलाई सरकारी कोषबाटै उद्वार गर्न आदेश जारी गरेको भन्दै कांग्रेसले सरकारी खर्चमै उद्धार गर्न माग गरेको छ ।
कांग्रेस प्रवक्ता विश्वप्रकाश शर्माले शनिबार जारी गरेको विज्ञप्तिमा सरकारले महंगो भाडादर तोकेर अदालतको आदेश उल्लंघन गरेको उल्लेख गरिएको छ । ६ महिनादेखि बेरोजगार भएर बसेका खाडीका श्रमिकलाई चार्टर फ्लाइटको महंगो टिकट खरिद गर्न लगाउनु न्यायोचित नभएको कांग्रेसको ठहर छ ।
चार्टर फ्लाईटको महंगो टिकट काट्नु पर्ने, होटेल क्वारेन्टाइनमा सात दिनको खर्च ब्यहोर्नुपर्ने, पीसीआर परीक्षण आफैं गराउनुपर्ने र गाउँ पुग्ने यातायात खर्च समेत आफै हाल्नुपर्ने सरकारी व्यवस्थाले वैदेशिक रोजगारीमा रहेका नेपालीका लागि सरकारले शत्रुको ब्यवहार गरेको कांग्रेसको आरोप छ ।
