डम्बर निदाल, डडेल्धुरा – डडेल्धुरा जिल्लाको अजयमेरु गाउँपालिकाका एक ब्यक्तिमा कोरोना पोजेटिभ देखिएको छ । उनि पिसिआर रिपोट नआउदै पर्सा जिल्लावाट घर आएका थिए ।जिल्लाको अजयमेरु गाउँपालिका वडा न २ मा पर्सा जिल्लाबाट आएका एक व्यक्तिमा कोरोना पोजेटिभ देखिएपछि गाउँ भरि संन्त्रास फैलिएको छ ।
पर्सा जिल्लामा शिक्षक पेशामा कार्यरत एक जना अजयमेरु गाउँपालिका वडा नं. २ का पुरुष घर आएको केही दिनमा उनको रिर्पोट पोजेटिभ आएको खबर आएपछि गाउँभरि कोरोनाको संन्त्रास फैलिएको हो ।पर्सा जिल्लामा कोरोना परिक्षणको लागि स्वाब दिएर घर आएका ति व्यक्तिमा कोरोना भएको खबर जिल्ला प्रहरी कार्यालयमार्फत जानकारीमा आएको हो । प्रहरीलाई दुई दिन अघि मात्रै घर आएको बताएपनि उनी केही दिन अघि नै घर आएको स्थानीयहरुले बताएका छन् ।
अहिले अजयमेरु गाउपालिका वडा नं. २ मा रहेको उनको पुरै गाउँलाई सिल गरि सवैको कोरोना परिक्षण गर्ने तयारी भईरहेको प्रहरी नायव उपरिक्षक दधिराम न्यौपानेले बताए । कोरोना संक्रमित घर आएदेखि कुन कुन ठाउँमा गएका थिए त्यसको टे«सिङ भईरहेको र उनी बस्ने गाउँलाई सिल गरि कोरोना परिक्षण गर्ने तयारी भईरहेको समेत प्रहरी प्रमुख न्यौपानेले बताए ।
पर्सा जिल्लामा कोरोना परिक्षणका लागि स्वाव दिएका ति व्यक्ति रिर्पोट नआउदै घर आएको र घरमा पनि उनले विभिन्न सामाजिक कार्यहरुमा सहभागिता जनाएको देखिन्छ । उनी उपभोक्ता समिति निर्माणको भेलादेखी अन्य सामाजिक कार्यमा समेत सक्रिय रहेकोले गाउँ नै कोरोना संक्रमणको उच्च जोखिममा रहेको स्थानीयले बताएका छन् ।
