काठमाडौँ- कोरोना संक्रमण फैलिन नदिन विभिन्न जिल्लामा अत्यावश्यकबाहेकका गतिविधि निषेध गरिए पनि पूर्णतः कार्यान्वयन हुन सकिरहेको छैन । काठमाडौं महानगरीय ट्राफिक प्रहरी महाशाखाका अनुसार जानकारी हुँदाहुँदै पनि मानिसले सरकारी आदेश र स्वास्थ्यसम्बन्धी मापदण्ड उल्लङ्घन गर्ने गरेको पाइएको छ । त्यस्ता गतिविधि गर्ने २ हजार १४ जना कार्बाहीमा परेका छन् ।
निषेधाज्ञा उल्लङ्घन हुन थालेपछि ३ दिनदेखि उपत्यकाका १ सय २० स्थानमा हुने छड्के जाँचका लागि १२० प्रहरी परिचालन गरिएको छ । उक्त टोलीले अत्यावश्यक सेवाका लागि हिँडेकाहरूको गतिविधिसमेत निगरानी गर्नेछ ।
मानिसको अटेरीपनका कारण जोखिम बढ्ने भएकाले त्यसविरुद्ध थप कडाइ गरिएको उनले बताए । निषेधाज्ञाको समयमा अत्यावश्यक कामका लागि सहजीकरण गरिएको छ, यस्तो अवस्थामा अत्यावश्यकका नाममा अनावश्यक घुमफिर भएकोसमेत पाइयो, त्यस्ता गतिविधि रोक्न छड्के जाँच सुरु गरिएको छ ।
मुख्यगरी प्रहरीको उपस्थिति नभएका ठाउँबाट अत्यावश्यक भनेर अनावश्यक रूपमा गाडी चलाउने पाइएको छ । नक्कली परिचयपत्र बनाएर हिँड्ने, अत्यावश्यक कामका लागि हिँडेको भनेर ढाँट्ने र बन्दाबन्दीका बेलाको सवारी पास बोकेर हिँड्नेसमेत फेला परेका छन् । काम नभईकन बैंकको कार्ड भिरेर अन्तै घुम्न हिँडेका व्यक्तिसमेत फेला परेको महाशाखाले जनाएको छ ।
महाशाखाका अनुसार काठमाडौँ उपत्यकामा निषेधाज्ञाको एक सातामा ७ हजार १ सय ६३ सवारीसाधनलाई ‘होल्ड’ मा राखेर कार्बाही गरिएको छ । त्यसमा ८० प्रतिशत मोटरसाइकल रहेको प्रहरीले जनाएको छ । दुई दिनमा मात्रै अत्यावश्यक काम भनेर अनावश्यक रूपमा हिँड्ने १ हजार १ सय २ जनालाई कार्बाही गरिएको छ । बिहीबार मात्रै ३ सय ६ जनालाई नियन्त्रणमा लिइसकिएको छ । उपत्यकामा दैनिक २०० देखि ३०० को हाराहारीमा नयाँ सङ्क्रमित थपिइरहेका छन् ।
उपत्यकाका तीन जिल्लामा यही भदौ १७ गतेसम्मका लागि निषेधको आदेश जारी गरिएको छ । निषेधाज्ञाका समयमा अत्यावश्यकबाहेक गतिविधि पूर्ण रोक लगाइएको छ ।
