डम्बर निदाल
डडेल्धुरा -डडेल्धुरामा शुक्रवार राती १२ देखि जिल्लाव्यापी रूपमा लागू हुने गरी लकडाउन अर्थात बन्दाबन्दी केही खुकुलो गरिएको छ । जिल्लामा संचालित निजि तथा सार्वजनिक सवारीसाधन (मोटरसाईकल ) मा भने जोरबिजोर कायमै गरिएको छ ।
जिल्ला स्तरीय कोभिड–१९ संकट व्यवस्थापन केन्द्रको शुक्रवार बसेको बैठकले शुक्रवार राती १२ बजे देखि यहि भदौ ३१ गतेसम्म लागू हुने गरी डडेल्धुरा जिल्लामा लकडाउन खुकुलो गरेको हो ।
जिल्लामा संचालित अतिआवश्यक सेवा तथा बस्तुहरु बिक्री वितरण गर्ने पसलहरू बाहेक अन्य सम्पूर्ण पसलहरू शुक्रवार रातीदेखि यहि भदौ ३१ गतेसम्मका लागि बिहान ६ बजेदेखि बेलुका ७ बजेसम्म नेपाल सरकारले तोकेको स्वास्थ्य सुरक्षा मापदण्ड अनिवार्य पालना गरेर मात्रै संचालन गर्न पाउने निर्णय गरेको छ । यसअघि पसलहरू बिहान ६ बजेदेखि ११ बजेसम्म मात्रै संचालन गर्न दिइएको थियो ।
यसका साथै जिल्लामा हुने सार्वजनिक मेला ,पर्व,भेला,सभा सम्मेलनलाई पुर्णवत रुपमा निषेध गर्ने निर्णय गरीएको छ । साथै सवारी पास नलिई अन्य जिल्ला वाट यस जिल्लामा आउने यात्रु वाहक सार्वजनिक र निजि सवारी साधन लाई पुर्णरुपमा निषेधित गरीएको जनाएको छ ।
जिल्लामा संचालित हुने निजि तथा सार्वजनिक सवारीसाधन (मोटरसाईकल ) मा समेत शुक्रवार राती देखि नै जोर–बिजोर प्रणाली कायमै गरिने सहायक प्रमुख जिल्ला अधिकारी बाबुराम अर्यालले जानकारी दिए ।
यसै गरी जिल्लामा संचालित सरकारी कार्यालय,संस्थान,बैङ्क तथा वित्तिय संघ संस्थाहरु तथा निजि क्षेत्रका कार्यालयहरुमा तोकिएको सुरक्षा मापदण्ड अबलम्बन गरी पुर्णवत रुपमा संचालन गरीने छन् । साथै अन्य ब्यवस्थाहरु यस अघिकै निर्णय अनुसार हुने जनाएको छ । यस अघि यहि भदौ ४ गते बिहिवार देखी १९ गते शुक्रवार सम्म का लागी आंशिक लकडाउन गरेको थियो ।
निर्णयको उल्लंघन हुने क्रियाकलाप कसैबाट भए गरेमा संक्रामक रोग ऐन, २०२० तथा अन्य प्रचलित कानुन बमोजिम कारबाही गरिने प्रशासन कार्यालयले जनाएको छ ।
