काठमाडौं – शुक्रबार राति १० बजेबाट ललितपुरमा लगाइएको कर्फ्यू हटेसँगै ललितपुरका दुई क्षेत्रलाई निषेधित क्षेत्र घोषणा गरिएको छ । जिल्ला प्रशासन कार्यालय ललितपुरले मछिन्द्रनाथको रथ रहेको ठाउँ पुल्चोक र मंगलबजारलाई निषेधित क्षेत्र घोषणा गरेको हो ।
प्रशासनले आजदेखि ६ दिनसम्म रथ रहेको क्षेत्र वरिपरि ५ जना भन्दा बढी व्यक्ति एकै ठाउँमा भेला हुन नपाउने आदेश जारी गरेको छ।
रथ रहेको क्षेत्रमा पूर्व मदन स्मारक देखि पश्चिममा महानगरपालिकाको कार्यालय, उत्तरमा बख्खुडो र दक्षिण सेन्टजेभियर स्कुलसम्मलाई निधेषित क्षेत्र घोषणा गरिएको छ । त्यस्तै मंगलबजारतर्फ पूर्व मंगलबजार चोक, पश्चिम मदनस्मारक अघिको चोक, उत्तरमा तिमबहाल र दक्षिण पूर्णचण्डी मन्दिरसम्मलाई निषेधित क्षेत्र घोषणा गरिएको छ ।
निषेधाज्ञाका बेला रथ तान्दा बिहीबार प्रहरी र रथ तान्न आएका व्यक्तिबीच झडपपछि प्रशासनले शुक्रबार बिहानदेखि राति १० बजेसम्म कर्फ्यू लगाएको थियो। त्यसपछि भने स्थिति सामान्य भएको छ ।
