ललितपुर – कोभिड-१९ को महामारीका कारण अन्योलमा परेको ललितपुरको रातो मच्छिन्द्रनाथको रथजात्रा आज तानिने भएको छ । स्वास्थ्य मापदण्ड पूरा गरेर व्यवस्थित तरिकाले रथलाई पुल्चोकको सोह्रखुट्टे पाटीसम्म तानिने भएको हो। यससँगै आज ललितपुरका बासिन्दाले छ्वयलाभू बनाउने भएका छन् ।
रथ तान्नको लागि विभिन्न जात्रा व्यवस्थापन समितिका ४०, ४० जना गरेर १६० जनाको मात्र सहभागिता रहनेछ । यी युवाहरू रथ तान्न आज दिउँसो ३ बजे गा: बहालमा भेला हुने छन् । रथ तान्नेहरूको पहिचानको लागि काय्गुननी टोलले १६० वटा टिसर्ट र १६० वटा टोपीको व्यवस्था गर्ने भएको छ।
जात्रामा ५ जोर धिमे बाजा बजाउनको लागि २० जना, काः बाजा बजाउने ४ जना र २ जोर नायखिं बाजा बजाउनको लागि ४ जनाको टोली तयार गरिएको छ। रथलाई हपाः दिने जिम्मा काय्गु ननी टोलले लिएको छ ।
त्यस्तै रथ तान्ने कार्यक्रममा स्थानीयहरु सहभागी नगराइने भएको छ। रथ तानिने क्षेत्रको केही चोकमा स्थानीयले भगवानलाई चढाउन ल्याएको फल, प्रसाद ज्यापु समाजका स्वयं सेवकहरुले चढाइदिने व्यस्था रहेको ज्यापु समाजले जनाएको छ।
मच्छिन्द्रनाथको रथ पुल्चोकमा ठड्याए पनि कोरोना संक्रमणको जोखिमका कारण तानिएको थिएन । रथ तान्न दबाब दिने उद्देश्यले पुल्चोकमा भेला भएका स्थानीय युवा र प्रहरीबीच तीन दिनअघि झडप भएको थियो ।
