उदयपुर- उदयपुरको बेलका नगरपालिकावासीले नि:शुल्क रूपमा दाँतको उपचार गर्न पाउने भएका छन् । बेलका घर भई काठमाडौं बस्ने युवाहरु आबद्ध बेलका विकास समाजले नगरपालिकाको केन्द्र रामपुरमा असार ७ गते (शनिवार) नि:शुल्क दन्त शिविर संचालन गर्न लागेको हो। शिविरका लागि काठमाडौंको ॐ समाज डेन्टल हस्पिटलबाट चिकित्सकहरुको ६ सदस्यीय टोलीसँगै अत्याधुनिक उपकरण बेलका लगिने आयोजक बेलका विकास समाजका अध्यक्ष महेन्द्र थापाले जानकारी दिए।
उनका अनुसार शिविरमा आवश्यकताअनुसार दाँत निकाल्ने, भर्ने, सफा गर्ने तथा परामर्श सेवा प्रदान गरिने छ। उदपुर क्षेत्र नम्बर १ का प्रतिनिधि सांसद डा. नारायण खड्काले दन्त शिविर उपयुक्त समयमा चलाउन लागेको भन्दै आयोजकलाई आगामी दिनमा पनि यस्ता सामाजिक काममा सकृय हुन युवाहरुलाई सुझाब दिए। बेलका नगरपालिकाका प्रमुख दुर्गाकुमार थापाले नगरवासीलाई आवश्यक सेवा समाजले प्रदान गर्न लागेको र बढिभन्दा बढी नागरिकलाई लाभान्वित गराउन नगरले पनि प्रयास गरिरहेको बताए।
शिविरका लागि बेलका नगरपालिकाले समन्वयकारी भूमिका निर्वाह गरेको उनले बताए। ॐ समाज डेन्टल हस्पिटलका संचालक डा. सुभाष घिमिरेले उदयपुरजस्तो ठाउँमा पूगेर आफ्नो हस्पिटलले सेवा प्रदान गर्ने अवसर पाएको र यसलाई प्रभावकारी बनाउन सबैखालको प्रयास गर्ने बताए। आयोजक बेलका विकास समाजका कोषाध्यक्ष बाबुराम खतिवडाले बेलकामा अहिलेसम्म भएका कुनै पनि शिविरभन्दा बढी सेवा प्रदान गरिने भन्दै शिविरबाट ५ हजार नागरिकलाई सेवा दिने दाबी गरे। शिविर शनिवारमात्रै चल्ने छ।
खतिवडाका अनुसार बेलकामा उपचार सम्भव नभए आर्थिक अवस्था कमजोर भएका विरामीलाई काठमाडौंसम्म पुर्याएर नि:शुल्क उपचार गर्ने व्यवस्था आयोजकले मिलाउने छ। बेलका नगरपालिका उदयपुरको पूर्वी भेगमा अवस्थित! नगरपालिका हो। यो नगरपालिकामा ५२ हजार बढी जनसंख्या छ।
