प्रहरीसँगकाे गुनासो अब सुझाव पेटिकामा

रामेछाप-रामेछापको मन्थली नगरपालिकामा प्रहरी कर्मचारी संग सम्बन्धित गुनासो र सुझाव संकलनकमा लागि पेटिका राखिएको छ ।
मन्थली नगरपालिकाका प्रमुख रमेशकुमार वस्नेत र जिल्ला प्रहरी कार्यालय रामेछापका प्रमुख प्रहरी नायव उपरिक्षक बसन्त पाठकले विहिबार संयुक्त रुपमा पेटिका स्थापना गरेका हुन । उक्त पेटिकामा प्रहरी कर्मचारीहरुले सेवा संचालनका क्रममा गरेका कमि कमजोरीको बारेमा गुनासो र सुधार गर्नुपर्ने कुरामा सुझाव हाल्न सकिने जनाइएको छ ।
नगरपालिका भवनको बाहिर झुण्ड्याइएको उक्त पेटिकामा हालिएका गुनासो र सुझावलाई हरेक महिनामा एक पटक झिकेर स्थानीय प्रतिनिधिको रोहवरमा गोप्य खामवन्दी गरी प्रदेश प्रहरी कार्यालयमा पठाइने छ । बाग्मती प्रदेश प्रहरी कार्यालयले उक्त पेटिकामा परेका गुनासो या सुझावलाई केलाएर त्यसमा कारवाहि र सुधारको कार्य गर्ने प्रहरी नायव उपरिक्षक बसन्त पाठकले वताएका छन् ।
पाठकका अनुसार बाग्मती प्रदेश प्रहरी कार्यालयले पेटिका संचालन कार्यविधिनै वनाएर हरेक पालिका र वडा तह सम्मै पेटिका राख्ने व्यवस्था गरेको छ । पहिलो चरणमा मन्थली नगरपालिका र रामेछाप नगरपालिकामा त्यस्तो गुनासो पेटिका राखीएको र क्रमस वडा तह सम्मै पेटिका स्थापना गरीने उनले वताए ।
मन्थली नगरपालिकाका प्रमुख रमेशकुमार वस्नेतले प्रहरी, स्थानीय र जनप्रतिनिधिको सहकार्यमा मात्रै समाजमा शान्ति सुरक्षा र अमनचयन हुने भएकाले सेवा प्रवाहलाई प्रभावकारी वनाउन सहयोग गर्ने प्रतिवद्धता जनाएका थिए ।