रामेछाप – संयोग पनि कस्तो ! जनकपुरमा रेल आईपुगेकै दिन रामेछापको मन्थलीमा बिजुली बस आईपुगेको छ । अव रामेछापबासीले बिजुली बसमा सरर यात्रा गर्दै काठमाण्डौं ओहोर दोहोर गर्न पाउने भएका छन् ।
वातावरणमैत्री विजुली वसको सेवा शुक्रबार देखि रामेछापमा सुरु भएको हो । उक्त बस सेवालाई दैनिक काठमाण्डौं देखि रामेछापको मन्थली सम्म ओहोर दोहोर गर्ने व्यवसायीक योजना संचालक भवलक्ष्मी यातायात सेवाले वनाएको छ । उक्त बस उपत्यका भन्दा बाहिर चल्ने पहिलो विजुलीबस भएको कम्पनीको दावि छ ।
एक पटक चार्ज गरेपछि करिव ३ सय किलोमिटर गुड्ने विजुली बस चीनमा उत्पादन भएको हो । नेपालको सडक उकालो ओरालो भएकाले उक्त बस झण्डै २ सय ३० किलोमिटर सम्म मात्र गुड्न सक्ने प्रयोगबाट देखिएको छ संचालकहरुले काठमाण्डौंमा चार्ज गरेपछि रामेछाप आएर फेरी काठमाण्डौं फर्कन सक्ने अपेक्षा गरेका थिए । तर काठमाण्डौंबाट १ सय २७ किलोमिटर पूर्वको रामेछाप आईपुगेको उक्त बसलाई पुन रिचार्ज गरेपछि मात्र काठमाण्डौं फर्काउनु पर्ने अवस्था देखिएको संचालक ऋतु चौलागाईले वताए ।
करिव १ करोड लागत पर्ने उक्त विजुली बसमा चालक सहित २० सिट छन्् । ईन्जिन र गियर नभएको उक्त वस सुविधाजनक रहेको दावि चौलागाईको छ । वसलाई सामान्य घरमा जोडिएको विद्युतबाटै रिचार्ज गर्न सकिन्छ । सामान्य विद्युत क्षमताबाट करिव ९ घण्टा र ठुलो क्षमताको चार्जिङ स्टेशनमा बढीमा २ घण्टामा रिचार्ज हुन्छ । चार्र्ज गर्नका लागि ८० देखि १ सय युनिट सम्म विजुली खर्च लाग्छ । विद्युत प्राधिकरणले विद्युतीय सवारी साधन चार्ज गर्दा खर्च हुने विद्युतको प्रति युनिट ३ रुपैया दस्तुर तोकेको छ ।
बिजुली बस संचालनले वातावरण प्रदुषण नहुने र यात्रा आरामदायि हुने सकिने दावि संचालकको छ । काठमाण्डौं देखि रामेछापको मन्थली सम्म दैनिक २ वटा बस संचालन गर्ने र त्यसको भाडा वजारको प्रतिस्पर्धी भाडा दरलाई नै आधार मानेर लिने वताइएको छ । मन्थली देखि काठमाण्डौको भाडा सुमो र हाईसमा प्रति यात्रु ५ सय छ । संचालक चौलागाईले सवैको सहयोग भएमा सेवा विस्तार गर्ने जनाएका छन् । उनले सरकारले तोकेका सवै मापदण्ड र सुविधा प्रदान गर्ने वताए । स्थानीय सरकारले चार्जिङ सेन्टरको स्थापना गरेमा व्यवसायलाई प्रवद्र्धन गर्न थप बल पुग्नेमा उनको जोड थियो ।
मन्थली नगरपालिका रामेछापका प्रमुख रमेशकुमार वस्नेतले वातावरणमैत्री विजुली वसको संचालनलाई व्यवसायीक र नियमित वनाउनु पर्ने वताए । उनले नगर र जिल्लाका धेरै सडक अवको केहि अवधिमा कालोपत्रे भइसक्ने भएकाले त्यस क्षेत्रमा सेवा र विजुली वसको संख्या विस्तार गर्दै जानुपर्नेमा जोड दिए । स्थानीय सरकार चार्जिङ सेन्टर निर्माणको लागि तत्पर रहेको वस्नेतले वताए ।
विजुली बसले जेष्ठ नागरिक, असक्त र विद्यार्थीलाई सहुलियत दिनुको साथै यात्राका क्रममा भनेको समयमा र तोकिएको भाडामा गुडाउन सक्नुपर्नेमा सहभागिले माग गरेका थिए ।

फेसबुकबाट तपाईको प्रतिक्रिया