आमनागरिक र प्रहरीबीच समन्वय भएमात्रै समुदाय–प्रहरी साझेदारी कार्यक्रम प्रभावकारी हुने सरोकारवालाले बताएका छन् ।
शनिबार महानगरीय प्रहरी वृत्त कमलपोखरीले काठमाडौं–५ स्थित ढुंगाधारामा आयोजना गरेको समुदाय प्रहरी साझेदारी कार्यक्रमअन्तर्गत ‘सामाजिक सुरक्षा विषयक’ अन्तरक्रियाका वक्ताहरुले प्रहरी र स्थानीयबीच समन्वय भए समुदाय–प्रहरी साझेदारी कार्यक्रमको उपलब्धि देखिने बताएका हुन् ।
कार्यक्रमका प्रमुख अतिथि प्रदेश सांसद नारायण सिलवालले स्थनीय नागरिकलाई कानुनी सचेतना प्रदान गर्नु सराहनीय कदम भएको र नागरिकको सहकार्यबिना शान्तिपूर्ण समाज निर्माण गर्न असम्भव भएको बताए । समाजमा अपराध घटाउनका लागि स्थानीयबासीले पनि विशेष रुपमा सजग हुनुपर्ने र प्रहरीलाई सहयोग गर्नुपर्ने उनले बताए ।
महानगरीय प्रहरी वृत्त कमलपोखरीका कार्यालय प्रमुख प्रहरी नायव उपरीक्षक रविन्द्र पौडेलले सामाजिक विकृतिको कारण सृजित अपराधको रोकथाम र न्यूनिकरणका लागि प्रहरीले स्थानीय सरकार, विद्यालय, समुदाय र सामाजिक संघ–संस्थासँग सहकार्य गरिरहेको बताए । कार्यक्रमका सहभागीले राखेका जिज्ञासाको उनले सम्बोधन गरेका थिए । काठमाडौं–५ का वडाअध्यक्ष रमेश डंगोलले सामाजमा अपराध न्यूनिकरणका लागि प्रहरीसँग मिलेर अघि बढ्ने बताए ।
