काठमाडौँ – जल तथा मौसम विज्ञान विभागले आज (सोमबार) देखि तिन दिनसम्म देशभरी मेघगर्जन, चट्याङ र हावाहुरीसहितको भारी वर्षा हुने पूर्वानुमान गरेको छ ।
केही स्थानमा हावाहुरीसहितको अधिक वर्षा हुने विभागले जानकारी दिएको छ । हाल उत्तर–पूर्व बंगालको खाडीमा रहेको न्यून चापीय क्षेत्र पश्चिम, उत्तर–पश्चिमतर्फ सर्ने क्रममा नेपालका विभिन्न भागमा भारी वर्षा हुने विभागको अनुमान छ । हावाहुरीसहित अधिक बर्षाको सम्भावना भएकाले आगामी बुधबारसम्म आवश्यक सतर्कता अपनाउन विभागले अनुरोध गरेको छ ।
आज दिउँसो देशभर सामान्य बदली भई केही स्थानमा मेघगर्जन र चट्याङसहित हल्कादेखि मध्यम वर्षा हुनेछ। प्रदेश १ र २ का केही स्थानमा हावाहुरीको संभावना भएको महाशाखाले जनाएको छ।
आज राति प्रदेश १, २ र बागमतीका केही स्थानमा भारी वर्षाको संभावना छ। यी प्रदेशसहित गण्डकी र प्रदेश ५ मा राति हावाहुरीको पनि संभावना छ।
भोलि मंगलबार पनि देशका केही स्थानमा मेघगर्जन र चट्याङसहित हल्का र मध्यम वर्षा हुनेछ। प्रदेश १, २, बागमती र गण्डकी प्रदेशका केही स्थानमा हावाहुरीसहित भारी वर्षाको सम्भावना रहेको महाशाखाले जनाएको छ।
त्यस्तै बुधबार पनि ती प्रदेशका केही स्थानमा हावाहुरी र भारी वर्षाको संभावना छ। देशभर सामान्य बदली भइ केही स्थानमा मेघगर्जन र चट्याङसहित हल्कादेखि मध्यम वर्षा हुने पनि महाशाखाले जनाएको छ।
