डम्बर निदाल
डडेल्धुरा -डडेल्धुरामा ट्राफिक प्रहरीले नमस्कार अभियान संचालन गरेको छ । जिल्ला ट्राफिक प्रहरी कार्यालय स्याउले डडेल्धुराले नमस्कार अभियान संचालन गरेको हो । यातायात ब्यवस्था सेवा कार्यालय डडेल्धुराका प्रतिनिधिहरुको सहयोगमा सवारीसाधन चेक जाच गर्ने र सडक अनुशासन कायम गर्न जिल्ला ट्राफिक प्रहरी कार्यालय डडेल्धुराले नमस्कार अभियान संचालन गरेको छ ।
नेपाल प्रहरी ट्राफिक महाशाखाको निर्देशन बमोजिम सुदूरपश्चिमका पहाडी जिल्ला अन्र्तगत डडेल्धुरा कार्य क्षेत्रमा रहेका मुख्य राजमार्गमा शिष्टताका साथ नमस्कार गरि यात्रु संख्या सँगै यातायातका सबै सवारी साधनमा चालक तथा गाडी कागजात पनि सवारी जाँच गरि आवश्यकता अनुसार कडा कारवाही पनि गर्ने गरेको छ ।
पछिल्लो समयमा ट्राफिक प्रहरी प्रति आम जनगुनासाहरु आएको भन्दै राजमार्गमा गुडने प्रत्येक यातायातका साधनहरु सँग भद्र र मित्रवत व्यवहारका साथै सडक अनुशासन कायम गर्ने उद्देश्यका साथ दुर्घटना न्यूनिकरणका उपायहरु पनि सुझाउन थालेको र सवारी चालकहरु लाई प्रोत्तसाहन स्वरुप खुशी बनाउनका लागी सो अभियान थालिएको जिल्ला ट्राफिक प्रहरी कार्यालय स्याउले डडेल्धुराका प्रहरी सहायक निरिक्षक देव बहादुर खत्रीले बताए ।
कोरोना संक्रमण व्याप्त रहेका बेला सवारीसाधनहरुमा स्वास्थ्य सुरक्षा सामग्रीको प्रयोग, मापदण्ड अनुसार यात्रुबाहक सवारी साधनहरु चलाउनु पर्ने, लाईसेन्स र गाडी धनी पूर्जा लगायतका कागजातहरु चुस्त र नविकरण भए नभएको नियमन गर्न नमस्कार सहितको अभियान सकारात्मक र उत्साहजनक रहेको सवारी साधन चालकहरुले बताएका छन ।
ट्राफिक प्रहरीले हेलचक्र्याई गर्ने र त्रुटि भएका मोटरसाईकल तथा सवारीसाधनहरुलाई यातायात व्यवस्था सेवा कार्यालय डडेल्धुराका प्रतिनिधिसहित असोज १ गते देखि शुरु भएको नमस्कार अभियान टोलीले बिभिन्न सवारीसाधनले ट्राफिक नियम उलंघन गरेका कारण कारवाही स्वरुप जरिवाना गरि तिस हजार जति राजस्व संकलन पनि गरेको जिल्ला ट्राफिक प्रहरी कार्यालय स्याउले डडेल्धुराका प्रमुख देव बहादुर खत्रीले जानकारी दिए ।
