युएई – सञ्जु सामसुङले विस्फोटक ब्याटिङ गरेपछि चेन्नाइ सुपर किङ्सविरुद्ध भारतीय प्रिमियर लिग (आईपीएल) को पहिलो खेलमा राजस्थान रोयल्सले १६ रनको जीत निकाल्यो । तेस्रो नम्बरमा आएका विकेट किपर तथा ब्याट्सम्यान सामसुङले २३ बलमा ७४ रन बनाए । उनले ९ छक्का र १ चक्का प्रहार गरेका थिए । उनलाई कप्तान स्टेफिन स्मिथले साथ दिएका थिए । कप्तान स्मिथले ६९ रन बनाएका थिए ।
ओपनर ब्याट्सम्यान यासाबी जयसवाललाई सुरुमै गुमाएको राजस्थानको इनिङ कप्तान स्मिथ र सञ्जुले सम्हालेका थिए । जोफर आर्चरले ८ बलमा २७ रनको ठोक्नुबाहेक त्यसपछि आएको ब्याट्सम्यानहरु खासै जम्न सकेनन । चेन्नाइका लागि साम करणले ३ विकेट लिए भने दिपक चाहरले १ विकेट लिए पनि किफायती बलिङ गरेका थिए ।
२ सय १७ रनको विजय लक्ष्य लिएर मैदानमा उत्रेका चेन्नाइले सुरुमा राम्रै प्रदर्शन गरे पनि मध्यक्रमका ब्याट्सम्यान चल्न नसक्दा लक्ष्य भेटाउन सकेन । उसले निर्धारित ओभर सकिँदा ६ विकेट गुमाएर २ सय रनमात्र बनाउन सक्यो ।
जीतका लागि १७ रन जोड्न नसक्दो चेन्नाइले पराजय व्यहोर्नु परेको थियो । मध्यक्रमका ब्याट्सम्यान फा डुब्लेसीले ३७ बलमा ७२ रन बनाए पनि टोलीलाई जिताउन सकेनन् । कप्तान महेन्द्रसिंह धोनीले १७ बलमा २९ रन बनाउँदा केदार जादबले २२ रनको योगदान दिएका थिए । राजस्थानका लागि राहुल टेबिटीवालले ३ विकेट लिए ।
आज साँझ ७ः४५ बजे मुम्बइ इन्डियन र कोलकता नाइटराइड्स अबुदाबीको सेख जायद स्टेडियममा भिड्ने छन् । यो आइपीएलको पाँचौं खेल हुनेछ ।
