डम्बर निदाल
डडेल्धुरा -अमरगढी नगरपालिकाले डडेल्धुरा अस्पताल लाई २० लाखको चेक हस्तान्तरण गरेको छ । डडेल्धुरा अस्पतालमा संचालन भएको पिसिआर ल्याब संचालन तथा संकट समाधानका लागि अमरगढी नगरपालिकाले अस्पताललाई २० लाखको चेक हस्तान्तरण गरेको हो ।
सुदुरपश्चिम प्रदेशका पहाडी जिल्लाको केन्द्र विन्दुमा रहेको डडेल्धुरा अस्पतालमा कोरोना परिक्षण ल्याब स्थापना भई पिसिआर परिक्षण भईरहेको छ । कोरोना नियन्त्रण तथा रोकथाम गर्ने उद्धेश्यले स्थापना गरीएकोे कोरोना परिक्षण प्रयोगशालालाई अझ व्यवस्थित गर्नका लागि अमरगढी नगरपालिकाले अस्पताललाई २० लाख रुपैया सहायता गरेको अमरगढी नगरपालिका प्रमुख विशेश्वर प्रसाद ओझाले बताएका छन् ।
कोरोनाको महामारी शुरु भएसंगै डडेल्धुराका स्थानिय तहहरुले डडेल्धुरा अस्पतालमा कोरोना परिक्षण प्रयोगशाला स्थापना गर्ने र उक्त प्रयोगशाला संचालनका लागि आर्थिक सहयोग गर्ने प्रतिवद्धता ब्यक्त गरेका थिए सोही प्रतिवद्धता अनुसार अस्पताललाई २० लाख सहयोग गरेको अमरगढी नगरपालिकाले जनाएको छ ।
डडेल्धुरामा कोरोना परिक्षण ल्याब संचालनमा आएपछि डडेल्धुरा लगायत सुदुरपश्चिमका अन्य जिल्लाहरुको पिसिआर परिक्षण हुदै आएको र पछिल्लो समय अस्पतालले प्रदान गर्ने सेवा सुविधाहरुमा पनि सुधार हुदै आएको र अझै डडेल्धुरा अस्पतालको गुणस्तर सुधारका लागि स्थानिय तहबाट भएको आर्थिक तथा भौतिक सहयोगले थप उर्जा प्राप्त भएको छ र स्थानिय तहहरुसंग सधै समन्वय र सहकार्य गरेर अगाडी बढ्ने अस्पताल विकास समिति अध्यक्ष करुणाकर ओझाले बताए ।
