डम्बर निदाल
डडेल्धुरा – डाक्टर गोबिन्द केसी लाई नागरीक समाज डडेल्धुराले समर्थन गरेको छ । चिकित्सा शिक्षा क्षेत्र सुधार तथा सुशासनका लागी १९औँ पटक सत्याग्रह थालेका डा. गोबिन्द केसी लाई नागरिक समाज डडेल्धुराले समर्थन गर्दै ऐक्यबद्धता जनाएको हो ।
यस पटक कर्णाली प्रदेशको विकट जिल्ला जुम्ला बाट सत्याग्रह सुरु गरेका डा. केसीले पटक पटक उठाएका मागहरु सम्बोधनका लागी नागरिक समाज डडेल्धुराले समर्थन जनाउदै ऐक्यबद्धता जनाएको आईतवार एक बिज्ञप्ती जारी गरी समर्थन जनाएको छ । जनताको मौलिक हक कार्यान्वयनका लागी सरकार आफै उत्साहित हुन अवसर प्राप्त हुदा हुदै पनि जनताका हितमा जायज मागहरु राखेर सडक संघर्ष वा सत्याग्रह गर्नु बिडम्बना पुर्ण रहेको ठहर नागरिक समाजको छ ।
डा. केसीले उठाएका मागहरु लाई अबिलम्ब सम्बोधनका लागी नागरिक समाज डडेल्धुरा जोडदार माग गर्दछ । आईतबार जारी गरिएको प्रेस विज्ञप्तिमा भनिएको छ । विज्ञप्ति मार्फत डा. केसीको स्वास्थ्य लाभको कामना पनि गरिएको छ ।
जवरजस्ती उपचारका लागी काठमाण्डौं लगिएका डा.केसीको स्वास्थ्य अवस्था कमजोर हुदै गएकोमा सत्याग्राही केसीका सबै मागहरु न्यायोचित रुपमा सम्बोधन गरि उहाको जीवन रक्षाका लागी नेपाली जनताको सर्वाेपरी हितमा रहेको औषधोपचार तथा स्वास्थ्य शिक्षामा न्यायिक पहुच मौलिक अधिकारको प्रत्याभुती र बिधिको शासन स्थापनामा सरकार सम्वेदनशिल हुनु पर्ने माग सहित डा.केसीले सुदूरपश्चिमका जनताको हितमा रहेको डडेल्धुरा अस्पताल स्तरोन्नती सहित मेडिकल कलेज स्थापनाका लागी १७औं अमरण अनसनमा उठाएका मागहरु पनि कार्यान्वयनमा लैजान हार्दिक आग्रह गर्दछ ।
समग्र नेपालीको भावना प्रतिबिम्बित भएको डा. केसीको मागलाई वेवास्ता गरिएमा स्वास्थ्य उपचारबाट बञ्चित र पिडित सुदूरपश्चिम प्रदेशका आम सर्बसाधारण लगायत डडेल्धुराबासीले सरकारका बिरुद्धमा कडा रुपले सडकमा उत्रिने चेतावनी दिदै समयमै सरकारको गम्भीर ध्यानाकर्षण गराउन चाहन्छौं ।
साथै बझाङ्गको मष्टा गाउँपालिका–२ की १२ बर्षिय सम्झना कामीको बलात्कार पछि निर्मम हत्या भएको घटनाले मानव सम्भयता लाई समेत लज्जित बनाएको घटनाको घोर निन्दा गरिएको छ । यस्तै कन्चनपुरकी १३ बर्षिया बालिका निर्मला हत्याकाण्डका दोषि लाई उन्मुक्ति भए झै सम्झनाले पनि न्याय नपाउने अवस्था नआओस भन्ने स्मरण गर्दै घटनाको सत्यतथ्य छानविन गरि अपराधि लाई यथाशिघ्र कडा कानुनी दायरामा ल्याउन सरकार संग माग राख्दछौ भनि विज्ञप्तिमा उल्लेख गरिएको छ ।
