राष्ट्रिय खेलकुद परिषद्को १८औं सदस्य सचिवका रुपमा रमेश सिलवाल नियुक्त भएका छन् । शुक्रबार बसेको मन्त्रिपरिषद बैठकले सिलवाललाई नियुक्त गरेको मन्त्रिपरिषद स्रोतले शिलापत्रलाई जानकारी दिएको छ ।
प्रधानमन्त्री केपी शर्मा ओलीका विश्वासपात्रका रुपमा चिनिएका उनी गोल्डेनगेट कलेजका सञ्चालक तथा निजी विद्यालयको छाता संगठन हिसानका अध्यक्ष पनि हुन् ।
पार्टी राजनीतिमा समेत ओली युवा संघको अध्यक्ष हुँदा सिलवालले सचिव भएर काम गरेका थिए । मदन भण्डारीको नाममा हुने खेलकुद गतिविधि सिलवालले नै गरेका थिए । नेपाल क्रिकेट संघ क्यान आईसीसीको निलम्बनमा पर्दा सरकारले सिलवालकै नेतृत्वमा क्यानको तदर्थ कमिटी बनाएको थियो ।
केशवकुमार विष्टको कार्यकाल ९ असारबाट सकिएपछि सरकारले नयाँ सदस्य सचिवका रुपमा सिलवाललाई नियुक्त गरेको हो ।
राखेपको सदस्य सचिव बन्न निवर्तमान सदस्य सचिव विष्टसहित राखेपा उपाध्यक्ष पीताम्बर तिमल्सिना, स्वयम्भुराज डंगोल, मीना श्रेष्ठ, दानबहादुर तामाङ, सुदिल शाही, गोविन्द शाहीलगायतले प्रयास गरेका थिए ।
