काठमाडौं – २५ दिनदेखि अनशनमा रहेका डा. गोविन्द केसीसँग आजबाट सरकारले औपचारिक वार्ता सुरु गरेको छ। डा. केसीका सहयोगी प्रितम सुवेदीका अनुसार साढे १० बजेबाट शिक्षा मन्त्रालयमा वार्ताका सुरु भएको हो । बुधबार सरकारले गठन गरेको वार्ता टोली र डा. गोविन्द केसीका प्रतिनिधिबीच पहिलो पटक औपचारिक वार्ता सुरु भएको छ ।
बुधबार सरकारले शिक्षा, विज्ञान तथा प्रविधि मन्त्रालयका सचिव गोपीनाथ मैनालीको नेतृत्वमा तीन सदस्यीय समिति गठन गरेको थियो। समितिमा स्वास्थ्य तथा जनसंख्या मन्त्रालयका सहसचिव डा. गुणराज लोहनी र चिकित्सा शिक्षा आयोगका निर्देशक दिलिप शर्मा सदस्य छन्।
सरकारले वार्ता टोली गठन गरे लगत्तै डा. केसीको तर्फबाट वार्ता गर्न चार सदस्यीय समिति गठन भएको छ। केसीको तर्फबाट डा. जीवन क्षेत्रीको संयोजकत्वमा चार सदस्यीय वार्ता टोली गठन भएको हो। डा. केसी वार्ता टोलीको सदस्यमा डा अंजनीकुमार झा, डा. लोचन कार्की र ओमप्रकाश अर्याल सदस्य छन्।
