काठमाडौँ – प्रधानमन्त्री केपी ओलीका प्रमुख तीनजना सल्लाहकारले कोरोना जितेका छन् । प्रधानमन्त्रीका मुख्य सल्लाहकार विष्णु रिमाल, परराष्ट्र सल्लाहकार डा. राजन भट्टराई र प्रेस सल्लाहकार सूर्य थापाको पछिल्लो स्वाब परीक्षणको रिपोर्ट नेगेटिभ आएको हो ।
प्रेस सल्लाहकार थापाका अनुसार पोजेटिभ रिपोर्ट आएको सात दिनपछि स्वाब परीक्षण गर्दा रिपोर्ट नेगेटिभ आएको हो । थापाका अनुसार उनीहरुका परिवारका सदस्यको रिपोर्टसमेत नेगेटिभ नै आएको छ ।
‘प्रधानमन्त्रीका मुख्य सल्लाहकार विष्णु रिमाल, परराष्ट्र सल्लाहकार डा. राजन भट्टराई र म प्रेस सल्लाहकार सूर्य थापाको पछिल्लो स्वाब परीक्षणको रिपोर्ट नेगेटिभ आएको छ’, थापाले भने, ‘परिवारका सदस्यहरूको कन्ट्याक्ट् ट्रेसिङ परीक्षणको रिपोर्ट पनि नेगेटिभ आएको छ ।’
आफूहरुले कोरोना जितेको भन्दै थापाले कोरोना संक्रमणको अवधिमा आइसोलेशनमा बस्दा शुभेच्छा र सद्भाव राख्नेप्रति आभारी व्यक्त गरेका छन् । ‘हामीले कोरोना संक्रमण जितेका छौं’, थापाले फेसबुकमा लेखेका छन्, ‘हामीप्रति शुभेच्छा र सद्भावका निम्ति सबै महानुभावप्रति कृतज्ञ र आभारी छौं ।’
