काठमाडौं– बुधबारदेखि इन्टरनेट महँगिने भएको छ । इन्टरनेट सेवामा १३ प्रतिशत दूरसञ्चार सेवा शुल्क(टीएनसी) लाग्ने भएपछि इन्टरनेट महँगिने भएको हो ।
संघीय संसदबाट पारित आर्थिक विधेयकमा टेलिफोन, मोबाइल इन्टरनेट सेवा प्रदायकबाट १३ प्रतिशत रकम दूरसञ्चार सेवा शुल्कवापत संकलन गर्ने व्यवस्था गरेसँगै उपभोक्तामाथि शुल्कको भाग बढ्ने भएको हो ।
यसअघि इन्टरनेटमा टीएससीसम्बन्धी प्रावधान नभएपनि आर्थिक विधेयकले १३ प्रतिशतको अतिरिक्त भार थपिदिएको छ ।
यसै आर्थिक वर्षदेखि टीएससीको व्यवस्था गरिएको थियो । तर सबैतिर विरोध भएपछि सरकार र इन्टरनेट सेवा प्रदायक कम्पनीबीच सहमति भएको थियो । जसका कारण उपभोक्तामाथि शुल्कको भार परेको थिएन । तर, सरकारले सहमति पालना नगरी जेठ १५ को बजेटमा पनि यसलाई निरन्तरता दिएपछि आगामी आर्थिक वर्षको सुरुवाटै अतिरिक्त शुल्न लिने भन्दै कम्पनीहरुले सेवाग्राहीलाई जानकारी गराएका छन् ।
हाल ग्राहकले जुन प्रकारको सेवामा जति शुल्क तिर्दै आएका थिए, बुधबारदेखि त्यही बिलिङमा १३ प्रतिशत अतिरिक्त शुल्क थपिएर आउने छ । अर्थात तपाईले मासिक १५ सय तिर्ने गर्नुभएको छ भने अब तपाईले १६९५ तिर्नुपर्ने हुन्छ ।
तर सरकारले भने कुनै हालतमा पनि इन्टरनेटको रकम थप नहुने बताउँदै आएको छ ।
सञ्चार एवं सूचना प्रविधि मन्त्रालयले इन्टरनेट प्रदायकहरुको माग मध्ये धेरै सम्बोधन भइसकेको र केही प्रकृयामा रहेको भन्दै रकम थप नहुने दाबी गरेको छ ।
