डम्बर निदाल
डडेल्धुरा -डडेल्धुरा जिल्लाको भित्रि मधेश आलि ताल गाउँपालिका स्थित पर्यटकीय गन्तव्य आलि ताललाई अब रातीको समयमा पनि अवलोकन गर्न सकिने भएको छ । गाउँपालिकाले सोलार बत्ती जडान गरेर आलि ताललाई रात्रीकालिन समयमा पनि सहजै अवलोकन गर्न सकिने बनाउन लागेको हो ।
तालको चारै तिर सोलार वत्ती जडान गरेर ताल क्षेत्रमै बस्न मिल्ने गरी सो क्षेत्रमा पर्यटन प्रवद्र्धनका पुर्वाधारहरु विकास गरिन लागेको आलिताल गाउँपालिकाले जनाएको छ । सोलार बत्तीका लागि चालु आर्थिक बर्षमा बजेट बिनियोजन गरिएको र चाँडै निर्माण कार्य थालिने आलिताल गाउँपालिकाका अध्यक्ष बलबहादुर गुरुङले बताए ।
जिल्लाकै पर्यटकिय क्षेत्र मध्ये महत्वपुर्ण क्षेत्र आलितालको प्रचार प्रसारका साथै पर्यटकको आर्कषण वढाउने उद्देश्यले गाउँपालिकाले भौतिक पुर्वाधारको निर्माणलाई जोड दिएको हो ।
सुदूरपश्चिम प्रदेश सरकार सहित आफ्नै लगानीमा गाउँपालिकाले आलिताल क्षेत्रको विकासका लागि चालु आर्थिक बर्षमा उक्त क्षेत्रमा पर्यटकीय पुर्वाधार विकासका काम गर्ने भएको छ । आलिताल क्षेत्रमै क्याम्पिङ गरी रातीको समयमा समेत अवलोकन गर्न सकिने व्यवस्थापन गर्न लागिएको हो । आलिताल क्षेत्रमा यसबर्ष करिब १० वटा सोलार वत्ती जडान गर्ने काम सम्पन्न गरिने छ ।
आलिताललाई रातीको समयमा अवलोकनसंगै क्याम्पिङ र फायर साइड बनाइने योजना अघि सारेको अध्यक्ष गुरुङको भनाई छ । तालको छेउमा चिया, कफी सप, चिसो पेय पदार्थसंगै खाना र खाजाको प्रबन्ध गरिने र पर्यटकहरुलाई राती बस्नका लागी क्याम्पहरु स्थापना गरिने अध्यक्ष गुरुङले जानकारी दिए ।
सुदूरपश्चिम प्रदेशकै सबैभन्दा ठुलो र मनमोहक मानिने आलितालमा हाल डुंगामा ताल सयर गर्न सकिन्छ । तालको अवलोकनका लागि भ्यूटावर पनि निर्माण गरिएको छ ।
तालको चारैतिर पक्की फुटपाथ बनाइएको छ । ताल क्षेत्रमा साइकलिङ पनि गर्न सकिन्छ । यसअघि आलिताल क्षेत्रमा पिकनिक स्पटका लागी घरहरु निर्माण गरिएका थिए ।
आलिताल धनगढी–डडेल्धुरा भिमदत्त राजमार्गको मध्य भाग डोटीको बुडरबाट करिब १८ किलोमिटर पश्चिम तर्फ पर्छ । बुडर–जोगबुडा सडकको पनि मध्य भाग गोदाम बजारबाट अढाई किलोमिटरको दुरीमा रहेको आलिताल पर्यटकीय सम्भावना बोकेको गन्तब्य क्षेत्रका रुपमा रहेको छ ।
हाल बुडर–जोगबुडा सडक कालोपत्रेको चरणमा छ । अहिले आलिताल नजिकैका गाउँमा होम स्टेका योजनाहरु पनि सञ्चालन गरिएका छन । कोरोना भाईरसको संक्रमण फैलिनु भन्दा अगाडी आलीतालको अवलोकन गर्न दैनिक ४०–५० जना पुग्ने गरेका थिए । कोरोना संक्रमणका कारण आलिताल भ्रमण गर्नेहरुको संख्यामा कमि आएको छ ।