सिन्धुली – बीपीले भनेका थिए, देश निर्माणको योजना बनाउँदा गाउँको झुपडी अगाडि राखेर बनाउनु । यो त्यही झुपडी हो, जहाँ बीपीका पिताजी कृष्णप्रसाद कोइराला जन्मनुभएको थियो । यो मुलुकमा २०४६ सालपछि दुई दशकभन्दा बढी सत्तामा नेपाली कांग्रेसले मोज र भोज गर्यो । यद्यपि, यो झुपडीलाई संरक्षण गरी पर्यटनको विकासका कहिल्यै ध्यान दिइएन ।
अहिले यो झुपडीको हालत यस्तो छ । खरको छाना फेर्न बीपी सङ्ग्रहालयले पाँच वर्षअघि दिएको ५० हजारले छानो निकालियो तर नयाँ छानो नहालिएका कारण यसपटकको वर्षामा भत्कन पुगेको छ ।
पुष्पकमल दाहाल प्रचण्ड प्रधानमन्त्री हुँदा दुम्जाको यो पवित्र स्थलको विकासका लागि बजेट विनियोजन गरिए पनि काम हुन सकेन । अघिल्लो वर्ष पनि केन्द्रीय बजेटका रुपमा प्राप्त ५० लाख राजनीतिक खिचातानीका कारण ल्याप्स हुनपुग्यो । यसमा बीपी सङ्ग्रहालयको हस्तक्षेपकारी भूमिका नै प्रमुख जिम्मेवार रहेको आरोप स्थानीयको छ ।
ऐतिहासिक दुम्जा पार्क निर्माणका लागि तीनतीनवटा उपभोक्ता समिति निर्माण भएपछि प्रदेश सरकारले बजेट कसलाई दिने भन्दै एउटै समिति बनाउन निर्देशन दिएको थियो । तर एउटै समिति निर्माणमा सहमति जुटाउन नसकेपछि बजेट ल्याप्स भएको हो ।
सुनकोशी गाउँपालिका वडा नम्बर १ मा रहेको सो क्षेत्रलाई पुनर्निर्माण गरे पर्यटकीय हिसाबले पनि राम्रो हुने स्थानीयको भनाइ छ ।
तस्वीर : बच्चु कोइरालाको फेसबुकबाट
