काठमाडौं – प्रधानमन्त्री केपी शर्मा ओलीले सरकार भ्रष्टाचार नियन्त्रणमा तीव्र रुपमा अघि बढेको बताएका छन् ।
मंगलबार राष्ट्रिय जनमोर्चाका अध्यक्ष चित्रबहादुर केसी नेतृत्वको प्रतिनिधिमण्डलसँगको भेटवार्तामा प्रधानमन्त्री ओलीले भ्रष्टाचारीहरू धमाधम पक्राउ परिरहेको बताएका हुन् ।
उनले पछिल्लो समय भ्रष्टाचार बढेको नभई सरकारी सक्रियतामा गिरफ्तारी बढेको दाबी गरे । ‘भ्रष्टाचारमा संलग्नलाई सानो ठूलो भनेर हेरिँदैन,’ उनले भने, ‘सबैलाई कारबाही हुन्छ ।’
प्रधानमन्त्री ओलीले विभिन्न ठाउँमा अतिक्रमण भएका र भूमाफियाले कब्जा गरेका सरकारी जग्गाहरू सरकारले विधि पुर्याएर फिर्ता लिने बताए ।
‘ललिता निवासको जग्गा पनि वर्तमान सरकारले छानबिन थालेको हो। तर यही सरकारले जग्गा हडपेको जस्तो गरी मान्छेहरू कराइरहेका छन्,’, प्रधानमन्त्री ओलीले भने, ‘योभन्दा अघिका सरकारहरू के हेरेर बसेका थिए। त्यतिबेला सरकारमा बसेका मान्छे नै अहिले ठूलाठूला कुरा गर्छन्।’
