काठमाडौं – अबको दुई/तीन दिनमा मनसुनी गतिविधि पुनः बढ्ने सम्भावना रहेको मौसम पूर्वानुमान महाशाखाले जनाएको छ ।
हाल मनसुनको न्यून चापीय रेखा नेपालको तराई भू–भाग भन्दा दक्षिण तिर रहेको महाशाखाले जनाएको छ । तर, अबको २/३ दिनपश्चात न्यून चापीय रेखा उत्तरतिर सर्दै नेपालको पश्चिमी तराई नजिक आउने सम्भावना रहेको महाशाखाले जनाएको छ । जसका कारण अबको २/३ दिन पछि मनसुनी गतिविधि बढ्ने महाशाखाको आँकलन छ ।
अहिले भने देशका धेरै जसो स्थानमा सामान्य बदली रहेको महाशाखाले जनाएको छ । त्यस्तै केही स्थानमा हल्का देखि मध्यम खालको वर्षा भइरहेको छ ।
बिहीबार (आज) दिउँसो देशभर सामान्य बदली भइ केही स्थानमा वर्षा हुने संभावना रहेको महाशाखाले जानकारी दिएको छ । त्यस्तै आज राति देशभर सामान्य बदली रही केही स्थानमा वर्षा हुने संभावना छ ।
शुक्रबार दिउँसो देशभर आंशिकदेखि सामान्य बदली रही केही स्थानहरुमा मेघगर्जनसहित वर्षा हुने संभावना छ । शुक्रबार राति भने देशभर आंशिकदेखि सामान्य बदली रही केही स्थानहरुमा मेघगर्जनसहित वर्षा हुने संभावना रहेको महाशाखाले जनाएको छ ।
त्यस्तै शनिबार दिउँसो देशभर आंशिकदेखि सामान्य बदली रही केही स्थानमा मेघगर्जनसहित वर्षा हुने तथा राति देशभर आंशिक देखि सामान्य बदली रही केही स्थानमा मेघगर्जनसहित वर्षा हुने संभावना रहेको महाशाखाले जनाएको छ ।
