काठमाडौं – भौतिक पूर्वाधार तथा यातायातमन्त्री रघुवीर महासेठले पूर्व पश्चिम विद्युतीय रेलमार्ग निर्माणलाई सरकारले तिब्रता दिने बताएका छन् ।
बिहिबार राष्ट्रिय सभामा विद्युतीय सवारीसम्बन्धी राष्ट्रिय कार्ययोजना कार्यान्वयनको अवस्थाका सम्बन्धमा सांसदहरुको प्रश्नको जवाफदिंदे यसअघि ३० किलोमिटर ट्रयाक बनाउने काम पूरा गरेको बताउँदै मन्त्री महासेठले रेलमार्ग निर्माणलाई तिव्रता दिने बताएका हुन् ।
उनले पूर्व पश्चिम विद्युतीय रेलमार्गको बीचमा परेको १ सय ६० किलोमिटर निकुञ्ज परेको भागबाहेक झापाको मेचीदेखि कञ्चनपुरको गड्डा चौकीसम्मको भागको ९ सय ४५ किलोमिटरको डिपिआर तयार भईसकेको पनि बताए ।
यस्तै काठमाडौं रसुवा–केरुङ र काठमाडौ–वीरगञ्ज विद्युतीय रेलमार्गका लागि प्रि फिजिबिलिटीको काम भएको बताउँदै उनले काठमाडौं पोखरा रेलमार्गको पनि अध्ययन गर्ने बताए ।
उनले काठमाडौं रसुवा ७६ किलोमिटर र काठमाडौं वीरगञ्ज १४० किलोमिटर विद्युतीय रेलमार्गको पूर्व सम्भाव्यता अध्ययन भएको पनि बताए ।
