काठमाडौं– स्वास्थ्य उपचारका लागि सिंगापुर गएका प्रधानमन्त्री केपी शर्मा ओली १० दिन पछि सोमबार स्वदेश फर्किएका छन् ।
थाई एयरवेजको जहाजमार्फत सोमबार मध्याह्न काठमाडौं उत्रिएका ओलीले विमानस्थलमा भने केही ‘परम्परा’ तोडे ।
प्रधानमन्त्री ओलीले सोमबार नेपाली सेनाको सलामी लिइनन् । यसअघि राष्ट्रपति, उपराष्ट्रपति र प्रधानमन्त्री विदेश भ्रमणमा जाँदा तथा फर्किदा नेपाली सेनाले सम्मानगारत (सलामी) अर्पण गर्ने परम्परा थियो ।
तर, प्रधानमन्त्रीले सिंगापुरको आफ्नो भ्रमण नितान्त व्यक्तिगत भएको भन्दै सेनाको सलामी लिन मानेनन् ।
यस्तै, स्वदेश फर्किदा विमानस्थलमा पत्रकार सम्मेलन गर्ने पम्परा पनि प्रधानमन्त्री ओलीले तोडिदिए । प्रधानमन्त्री ओलीको कुरा सुन्न सञ्चारकर्मीहरु विमानस्थलको अति विशिष्ट कक्षमा उपस्थिति भएका थिए ।
सञ्चारकर्मीहरुले अनौपचारिक रुपमा प्रधानमन्त्री ओलीको उपचार र स्वास्थ्य अवस्थाबारे जिज्ञासा राखे । जवाफमा प्रधानमन्त्री ओलीले भने, ‘मेरो स्वास्थ्य अवस्था हेर्दा पनि थाहा भइहाल्यो होला नि !’
प्रधानमन्त्री ओलीले त्यसबाहेक आफ्नो उपचार र स्वास्थ्य अवस्थाबारे कुनै प्रतिक्रिया दिएनन् । पछि थाहा पाइहाल्नुहुन्छ भन्दै प्रधानमन्त्री ओली विमानस्थलबाट बाहिरिए ।
