काठमाडौं – नेकपा माओवादी केन्द्रका अध्यक्ष पुष्पकमल दाहाल (प्रचण्ड)ले प्रधानमन्त्री केपी शर्मा ओलीलाई विश्वासको मत यो सदनले नदिने प्रस्ट्याएका छन्।
‘प्रमले विश्वासको मतको निम्ति आग्रह गर्नुभएको छ। प्रमलाई राम्ररी थाहा छ यो सदनले विश्वासको मत दिँदैन,’ प्रचण्डले भने, ‘बुझ्दाबुझ्दै झुटो दाबी गर्नुभएको छ। तपाईँको सरकार गठनदेखि हेर्दाखेरी विश्वासको मत दिने आधार छैन्।’
उनले विश्वासको मत माग्ने नैतिक अधिकार ओलीसँग नरहेको तर्क पनि गरे। ‘तपाईँले विश्वासको मत राख्ने नैतिक अधिकार छ र?,’ उनले प्रश्न गरे, ‘तपाईँ फेरि विघटनको बाटो बनाउनका लागि आउनु भएको त होइन?’
संसद पुनस्थापन भएकै दिन राजीनामा दिएर नयाँ सरकारको गठनको विकल्प दिन उपयुक्त हुन्छ भनेको स्मरण गर्दै प्रचण्डले भन अहिले पनि राजीनामा गरेर नयाँ सरकारको बाटो खुल्ला गरिदिनु संविधानसम्मत हुने बताए।
उनले संविधान बनाउने बेलामा विगतका गल्ती दोहोरिन दिन हुँदैन भनेर संविधानमा प्रावधान राखेको बताए। उनले संसदको अहिलेको अवस्थामा सांसद किनबेचको अवस्था देखिन थालेको समेत जनाउँदै चिन्ता जाहेर गरे।
‘देशमा जुन संकट, लोकतान्तिक प्रणालीमा संकट मुख्य रुपमा कसका कारण आयो? के तपाईँ छातीमा हात राखेर आत्मसमीक्षा गर्न सक्नुहुन्छ?,’ उनले चुनौती दिए, ‘म हो कि तपाईँ हो राष्ट्रिय समस्या?’
आफूले ओलीलाई प्रधानमन्त्रीमा प्रस्ताव गरेको जनाउँदै उनले पार्टी भित्र आफूले कहिले अवरोध गरेको बताउन चुनौती दिए। ‘बरु यसका लागि तपाईँ नै जिम्मेवार हो। तपाईँले विकास र समृद्धिको सपना डे वान देखि नै अवरोध गर्नुभयो। पार्टीभित्रको लोकतान्त्रिक छलफललाई कचिगंल भनेर प्रतिनिधिसभा विघटन गरेको हो,’ उनले भने।
