नेपाली कांग्रेसका वरिष्ठ नेता तथा पूर्वउपप्रधानमन्त्री गोपालमान श्रेष्ठ को ८३ वर्षको उमेरमा निधन भएको छ। जावलाखेलस्थित हेलिअस अस्पतालमा उपचारका क्रममा मंगलबार उनको निधन भएको हो।
गण्डकी प्रदेशका पूर्वमन्त्री मेखलाल श्रेष्ठले सामाजिक सञ्जालमार्फत श्रेष्ठको निधनको पुष्टि गरेका छन्। उनका अनुसार श्रेष्ठको पार्थिव शरीर बुधबार बिहान ८ बजेदेखि ११ बजेसम्म नेपाली कांग्रेसको केन्द्रीय कार्यालयमा श्रद्धाञ्जलीका लागि राखिनेछ। त्यसपछि शवयात्रासहित पशुपति आर्यघाटमा अन्त्येष्टि गरिने कार्यक्रम रहेको छ।
स्वर्गीय श्रेष्ठ लामो समयदेखि क्यान्सरसँग जुधिरहेका थिए। उनी नेपाली कांग्रेसका पूर्वउपसभापति, कार्यवाहक सभापतिलगायत विभिन्न जिम्मेवारीमा रहेर पार्टी राजनीतिमा सक्रिय योगदान दिएका नेता थिए।
नेपाली कांग्रेसका सभापति गगन थापाले साउन ७ गते श्रेष्ठलाई पार्टीको वरिष्ठ नेतामा मनोनीत गरेको घोषणा गरेका थिए।
