काठमाडौं — नेपाली सेनाले सैनिक अधिकारीहरूका लागि सञ्चालन गरेको सि.सं. १४ हायर कमाण्ड तथा म्यानेजमेन्ट (Higher Command and Management Course) तालिम सम्पन्न गरेको छ। नेपाली सैनिक वार कलेजमा २०८२ चैत १५ गतेदेखि सञ्चालन भएको उक्त तालिम सोमबार प्रधान सेनापति महारथी अशोक राज सिग्देलले आयोजित एक कार्यक्रमबीच समापन गरेका हुन्।
नेपाली सेनाका अनुसार तालिममा महासेनानी दर्जाका ३६ जना शिक्षार्थी सहभागी थिए। समापन कार्यक्रममा तालिम प्रमुख शिक्षक उपरथी मधुकर सिंह काफ्लेले स्वागत मन्तव्य व्यक्त गरेका थिए। तालिममा महासेनानी प्रशान्त बज्राचार्य प्रथम (Best Student Officer) घोषित भएका छन् भने सर्वोत्कृष्ट शोधपत्र पुरस्कार महासेनानी प्रकाश थापाले प्राप्त गरेका छन्।
समापन समारोहमा पूर्व प्रधान सेनापतिहरू, रथीवृन्द, अधिकृतहरू तथा शिक्षार्थी अधिकृतका परिवारजनको उपस्थिति रहेको नेपाली सेनाले जनाएको छ।
नेपाली सेनाले अधिकारीहरूको नेतृत्व क्षमता, रणनीतिक सोच तथा राष्ट्रिय एवं अन्तर्राष्ट्रिय सुरक्षा सम्बन्धी ज्ञान अभिवृद्धि गर्ने उद्देश्यले सञ्चालन गर्दै आएको उक्त तालिममा Statecraft, Geopolitics and Economic Dynamics, Political Philosophy, Diplomacy, World Order, Military and Security Strategy तथा Leadership and Management लगायतका विषय समेटिएका छन्।
वि.सं. २०५७ सालदेखि सञ्चालन हुँदै आएको यस हायर कमाण्ड तथा म्यानेजमेन्ट तालिमबाट हालसम्म ४१० जना अधिकृत दीक्षित भइसकेका नेपाली सेनाले जनाएको छ।
