भारत सरकारले नेपालका प्रधानमन्त्री वालेन्द्र शाह ‘बालेन’लाई औपचारिक रूपमा भारत भ्रमणको निम्तो दिएको छ।
भारतीय विदेश मन्त्रालयका प्रवक्ता रणधीर जैसवालले प्रधानमन्त्री बालेनलाई भारत भ्रमणका लागि निमन्त्रणा पठाइएको जानकारी दिएका हुन्। उनले भ्रमणको मिति भने दुवै देशको आपसी सहमतिमा तय हुने बताएका छन्।
प्रधानमन्त्री बालेन नेतृत्वको सरकार गठन भएपछि उनी हालसम्म कुनै पनि विदेश भ्रमणमा गएका छैनन्। भारतको निम्तो स्वीकार भएमा प्रधानमन्त्रीका रूपमा उनको पहिलो विदेश भ्रमण भारतबाट सुरु हुनेछ।
नेपाल–भारतबीचको द्विपक्षीय सम्बन्ध, व्यापार, पारवहन, ऊर्जा, पूर्वाधार, सीमा व्यवस्थापन तथा आपसी हितका विविध विषय भ्रमणका क्रममा छलफल हुने अपेक्षा गरिएको छ।
भ्रमणको सम्भावित मिति र कार्यसूचीबारे भने दुवै सरकारले हालसम्म औपचारिक जानकारी सार्वजनिक गरेका छैनन्।
