काठमाडौँ- पूर्वीमध्य बंगालको खाडीमा रहेको न्यून–चापीय प्रणाली ‘चक्रवात’मा परिणत भएको जल तथा मौसम पूर्वानुमान महाशाखाले जनाएको छ ।
उत्तर–उत्तरपश्चिमतिर सर्ने क्रममा यो चक्रवातले बुधबारसम्म शक्तिशाली स्वरूप लिने भएकाले यसको असर नेपालमा पनि पर्न सक्ने महाशाखाले जनाएको छ ।
चक्रवात शक्तिशाली भएमा बुधबारदेखि केही दिनसम्म नेपालमा त्यसको प्रभाव नेपालमा पनि देखिन सक्ने महाशाखाका मौसमविद् वरुण पौडेलले जानकारी दिए ।
‘चक्रवातको असर मध्य र पश्चिम क्षेत्रमाभन्दा नेपालको पूर्वी क्षेत्रमा बढी पर्नेछ, सावधानिका उपायहरू अपनाउन हामी आह्वान गर्छौँ,’ पौडेलले भने,’त्यसको आंशिक असर त आजदेखि नै देखिने छ ।’
महाशाखाका अनुसार आज अपरान्हपछि देशका धेरै स्थानमा सामान्यदेखी पूर्ण बदलीको भई वाग्मती प्रदेश र प्रदेश १ का उच्च हिमाली र पहाडी भू–भागका केही स्थानमा हल्कादेखि मध्यम हिमपात/वर्षाको सम्भावना रहेको छ ।
उच्च हिमाली भू–भागमा हावाहुरीसमेत हुनसक्ने सम्भावना रहेकाले आजदेखि केही दिनसम्मका लागि पर्वतारोहीहरूलाई मौसम अनुसार सतर्कता अपनाई सुरक्षित रहन आग्रह गरिएको छ ।
बुधबारदेखि केही दिन हल्कादेखि मध्यम वर्षाको सम्भावना रहेको महाशाखाले जनाएको छ ।
प्रदेश १, प्रदेश २, वाग्मती प्रदेश, गण्डकी प्रदेश र लुम्बिनी प्रदेशका केही स्थानमा भारी वर्षा हुने सम्भावना रहेको छ यो क्रम बिहीबारसम्म नै जारी रहने महाशाखाले जारी गरेको पूर्वानुमान बुलेटिनमा उल्लेख छ ।
