रामेछाप – रामेछापको मन्थलीमा बहुउद्देश्यीय अत्याधुनिक कवर्डहल निर्माणकाे काम सुरु भएकाे छ ।
मन्थलीमा निर्माण हुने बहुद्धेश्यीय अत्याधुनिक कवर्डहलको मंगलबार प्रदेश ३ का आर्थिक मामिला तथा योजना मन्त्री कैलाशप्रसाद ढुंगेलले सिलन्यास गर्नुभएको छ ।
मन्थली नगरपालिका २ को भुत्याहाखोला नजिक निर्माण हुने उक्त कवर्डहल २ बर्ष भित्र निर्माण पुरा गर्ने लक्ष्य लिइएको छ । योजनाको विस्तृत परियोजना प्रतिवेदन बमोजिम उक्त कवर्डल निर्माणका लागि करीव १३ करोड १३ लाख ९० हजार रुयैंया खर्च लाग्ने अनुमान गरिएकाे छ । उक्त कवर्डहलमा सबै खालेे खेलकुद प्रतियोगिताका साथै धार्मिक, सांस्कृतिक र राजनीतिक सभाका लागि समेत उपयुक्त हुने गरी डिजाईन गरीएको छ । सो कवर्डहलमा करिव १ हजार २ सय जना अटाउन सक्ने क्षमता छ ।
जिल्ला समन्वय समितिका प्रमुख प्रेमवहादुर खड्काको अध्यक्षतामा भएको उक्त कवर्डहल सिलन्यास कार्यक्रममा बोल्दै मन्त्री ढुंगेलले प्रदेश सरकार र यस क्षेत्रको जनप्रतिनिधिको हैसियतले ठुला विकास निर्माणका कार्यमा ध्यान दिएको वताउनुभयो । उहाँले खेल मैदान र कबर्डहल, शितभण्डार गृह, कालोपत्रे सडक, विद्यालयमा नर्स कार्यक्रम, स्थानीय सरकारका लागि कानुनी सहजकर्ता, सामुदायिक विद्यालयहरुलाई अनुदान लगाएतका काममा प्रदेश सरकारले काम गरेको वताउनु भयो । उहाँले विकास निर्माणका काम गुणस्तरयुक्त वनाउन र सवैले त्यस बारेमा जानकारी पाउने गरी पारदर्सिता कायम गराउनका लागि निर्देशन दिनुभयो । कार्यक्रममा मन्थली नगरपालिकाका प्रमुख रमेशकुमार वस्नेतले समेत मन्तव्य राखनु भएकाे थियाे । सार्वजनिक निर्माण कार्यालय धुलिखेल मार्फत निर्माण हुने उक्त कवर्डहलको ठेक्का फाईटस्टार एण्ड स्टार्ट कम्पनीले पाएको छ । कवर्डहलको जग खन्ने काम सम्पन्न भइसकेको छ । यसै बर्ष प्रदेश सरकारको बजेटबाट सानीमदौंमा प्यारापिट सहितको रंगशालको निमाृण समेत हुने भएको छ ।
